बुटवल । रुपन्देहीमा वैवाहिक बलात्कार विरुद्धको मुद्धा दर्ता भएको छ ।
तिलोत्तमा नगरपालिकामा एक महिलाले आफ्नै श्रीमानविरुद्ध लामो समयदेखि जबर्जस्ती करणी गरेको भन्दै वैवाहिक बलात्कारको मुद्धा दर्ता गराएकी हुन ।
तिलोत्तमा नगरपालिका– १७ निवासी उक्त पुरुष विरुद्ध इलाका प्रहरी कार्यालय, बुटवलमा पुगेर पीडित भनिएकी महिलाले गत मंगलबार ‘आफ्नै पतिले बलात्कार गरेको’ भन्दै किटानी जाहेरी दिएकी हुन्।
डीएसपी ठगबहादुर केसीका अनुसार चौधरी थरकी ती महिलालाई ६ महिनादेखि मादकपदार्थ तथा लागूपदार्थ खाएर उनका श्रीमानले कुटपिट गर्नाका साथै बिरामी हुँदा पनि श्रीमानले इच्छाविपरीत जबर्जस्ती करणी गरेको आरोप लागेको छ ।
सो अत्याचारबारे परिवारजन र आफान्तलाई जानकारी गराउँदा पनि वास्ता नगरे पछि प्रहरीसमक्ष उजुरी गर्न आएको महिलाले बताएकी छिन् । उजुरी लगत्तै सो बारेमा अनुसन्धान जारी राखिएको प्रहरीको भनाई छ ।
आफ्नै पत्नीलाईसमेत इच्छाविपरीत जबर्जस्ती करणी गरे ५ वर्षसम्म जेल सजाय हुने कानुनी व्यवस्था रहेको छ।
प्रतिक्रिया