गाँजा खेती विरुद्ध प्रहरीको ‘एक्सन’, प्रहरी प्रमुख नै हंसिया बोकेर गाँजा फडानीमा

अर्घाखाँची । अर्घाखाँची प्रहरी जिल्लामा भईरहेको गाँजाको खेती विरुद्ध एकसनमा उत्रिएको छ । जिल्लाको सदरमुकाम रहेको सन्धिखर्क नगरपालिका भित्रै व्यवसायिक गाँजा खेती भएको पाईएपछि प्रहरीले एक्सन लिएको हो ।

हालै सरुवा भएर अर्घाखाँची प्रहरी प्रमुखकारुपमा पुगेका डीएसपी मुकुन्द रिजाल आफै प्रहरी टोली सहित गाँजाको बोट फडानीमा खटिएका थिए । डीएसपी रिजालको कमाण्डमा १० जनाको प्रहरी टोली सहित स्थानीय जनप्रतिनिधिको उपस्थितीमा २५०० बढी गाँजाका बोटहरु फडानी गरिएको प्रहरीले जनाएको छ । अर्घाखाँची सन्धिखर्क नगरपालिका अन्तर्गत विभिन्न स्थानहरुमा अवैध रुपमा खेती गरिएको गाँजाका बोटहरु फडानी गरी नष्ट गरिएको रिजालले जानकारी दिए ।

सो अवसरमा डीएसपी रिजालले स्थानीयलाई लागु औषध सम्बन्धी सचेतनामुलक प्रशिक्षण समेत दिएका थिए ।