काठमाडौं । नेपाली कांग्रेसको संस्थापन विरोधी समुहले आन्दोलनको घोषणा गरेको छ ।
आगामी चुनावमा दिइने टिकट वितरणमा संस्थापन समुहले एकलौटी गर्न खोजेको विरोधमा संस्थापन विरोधी शेखर कोइराला समुहले आन्दोलनको घोषणा गरेकोहो ।
सोमबार बिहान ठमेलस्थित एक होटलमा बसेको संस्थापनइतर समूहका नेताहरूको बैठकले असोज १२ गतेदेखि १४ गतेसम्म पार्टी नेतृत्व विरुद्ध आन्दोलनको घोषणा गरेको छ ।
उनीहरुले संस्थापन पक्षलाई दबाब दिन असोज १२ गते पार्टी केन्द्रीय कार्यालयमा धर्ना दिने कार्यक्रम बनाएकाछन् । यस्तै, असोज १३ गते बत्तिसपुतलीमा चियापान तथा विरोध सभा गर्ने र असोज १४ भित्र समानुपातिक उम्मेदवारको सूची सच्याउन नेतृत्वसँग माग गर्ने योजना बनाएका छन् । चियापानमा कोइराला पक्षबाट जितेका पदाधिकारीलाई पनि बोलाउने उनीहरुले निर्णय गरेका छन्।समानुपातिक उम्मेदवारको सूची संशोधन नगरे प्रत्यक्षमा बागी उम्मेदवारी दिने उनीहरुले चेतावनी दिएका छन् ।
बैठकमा जगदीश्वरनरसिंह केसी, गुरुराज घिमिरे, भुपेन्द्रजंग शाही, जितनारायण श्रेष्ठ, प्रतिमा गौतम, अजयबाबु शिवाकोटी, मधु आचार्य, प्रकाश स्नेही, रामनाथ अधिकारी, राजेन्द्र बगजाईं लगायतका नेताहरु सहभागी थिए । उनीहरुले गुटका आधारमा टिकट वितरण गर्न नपाइने भन्दै नेतृत्वलाई खबरदारी गर्न लागेका हुन् । तर, आफ्नो गुटलाई संस्थापन पक्षले ४० प्रतिशत नदिएकोमा उनीहरु सबैभन्दा आक्रोशित भएका हुन् ।
प्रतिक्रिया