सुरक्षित यात्राको कामना गर्दै ट्राफिक प्रहरीद्धारा चालकलाई फुलमाला

काठमाडौं । प्रायः सडकमा सिटी फुक्दै चालकलाई कागजपत्र माग्ने, गाली गर्ने र जरिवाना तिराउने ट्राफिक प्रहरीले आफ्नो रणनीति परिवर्तन गर्दै चालक मैत्री बन्ने प्रयास थालेको छ ।

चाडपर्वलाई लक्षित गरेर लामो दूरीमा चल्ने सवारी साधनका चालकलाई आज काठमाडौँको नयाँ बसपार्कबाट ट्राफिक प्रहरीले फुलमाला लगाइदिएर सुरक्षित यात्राको कामना गर्दै बिदा गरेको छ । काठमाडौ उपत्यका ट्राफिक प्रहरी कार्यालय, यातायात व्यवसायी र सामुदायिक सेवा केन्द्र वसपार्कका पदाधिकारी सहितको टोलीले चालकलाई माला लगाएर सुरक्षित यात्राको कामना गरेर बसपार्कबाट बिदा गरेको हो ।

सचेत भएर सवारी चलाउने सचेतना सहित फुलमाला लगाइदिएर काठमाडौं बसपार्कबाट बिदाई गरि पठाईएको काठमाडौ उपत्यका ट्राफिक प्रहरी कार्यालयका प्रहरी नायब उपरीक्षक सन्तोष रोकाले जानकारी दिए ।

दशैं, तिहार लगायतका पर्वहरू मनाउनका लागि काठमाडौँ उपत्यकाबाट बाहिरिने सवारी साधन र यात्रुको चाप बढ्दो छ । यो समयमा थप सचेत भएर सवारी साधन चलाउन आवश्यक रहेकाले चालकलाई हौसला प्रदान गरिएको डीएसपी रोकाले बताए ।