धनगढी । टीकापुर घटनामा अदालतले जन्म कैदको फैसला सुनाइएका निलम्बित प्रतिनिधिसभा सदस्य रेशमलाल चौधरीले गठन गरेको नागरिक उन्मुक्ति पार्टीले कैलाली जिल्लाका लागि प्रतिनिधिसभा र प्रदेशसभातर्फका उम्मेदवारको टुंगो लगाएको छ ।
सो पार्टीका प्रवक्ता दामोदर पण्डितका अनुसार जिल्लामा प्रतिनिधिसभातर्फका ५ र प्रदेशसभातर्फका १० सिटको उम्मेदवारको नाम पार्टीले टुंगो लर्गाको हो ।
कैलाली क्षेत्र नम्बर १ मा पार्टी अध्यक्ष रञ्जिता श्रेष्ठलाई उम्मेदवार चयन गरिएको छ भने प्रदेशसभा (क) मा कैलाली जिल्ला कमिटी अध्यक्षसमेत रहेका कैलाश चौधरी र (ख) मा लक्ष्मण किशोर थारुलाई उम्मेदवार बनाइएको छ ।
निर्वाचन क्षेत्र नम्बर २ मा प्रतिनिधिसभातर्फ अरुणकुमार चौधरी, प्रदेशसभा (क) मा पार्टी महासचिव रतनकुमार थापा र (ख) मा रामेश्वर चौधरी उम्मेदवार बन्नेछन् । थापा एमाले कैलालीका निवर्तमान अध्यक्षसमेत हुन् । उनलाई एमालेले कारवाही गरेपछि नागरिक उन्मुक्ति पार्टीमा प्रवेश गरेका थिए ।
निर्वाचन क्षेत्र नम्बर ३ मा पार्टी केन्द्रीय सदस्य गंगा चौधरी प्रतिनिधिसभा सदस्यको उम्मेदवार बन्नेछन् भने प्रदेशसभा (क) मा घनश्याम चौधरी र (ख) मा खुसीराम चौधरी (भिमसेन) उम्मेदवार हुनेछन् । क्षेत्र नम्बर ४ मा प्रतिनिधिसभा सदस्यमा कैन्या चौधरी, प्रदेशसभा (क) मा राजेन्द्र देवकोटा र प्रदेशसभा (ख) मा कमल भट्टलाई उम्मेदवार बनाउने पार्टीले निर्णय गरेको छ ।
त्यसैगरि नागरिक उन्मुक्ति पार्टीले क्षेत्र नम्बर ५ मा टीकापुर घटनामा दोषी ठहर भएका लक्ष्मण थारुलाई प्रतिनिधिसभा सदस्यको उम्मेदवार बनाउने भएको छ भने प्रदेशसभातर्फ नाम गोप्य राखिएको छ ।
शुक्रबारसम्म देशभरका ४१ जिल्लामा उम्मेदवार उठाउने तयारी रहेको प्रवक्ता पण्डितले बताए । मनोनयन दर्ताको समयसम्म त्यो संख्या बढेर ५० जति पुग्ने उनले दाबी पनि गरे ।
प्रतिक्रिया