क्रिकेटर सन्दीप लामिछानेलाई १२ वर्ष कैद सजाँय माग गर्दै प्रहरीको अनुसन्धान प्रतिवेदन तयार

काठमाडौँ । नाबालिग बलात्कार आरोपमा पक्राउ परेका राष्ट्रिय क्रिकेट टिमका निलम्बित कप्तान सन्दीप लामिछानेलाई १२ वर्षसम्म कैद सजाय माग दाबीसहित जिल्ला सरकारी वकिलको कार्यालय काठमाडौंमा प्रहरीले अनुसन्धान प्रतिवेदन बुझाएको छ ।

जाहेरी परेको करिब डेढ महिनापछि आइतबार प्रहरी वृत्त गौशालाले सरकारी वकिलको कार्यालयमा अनुसन्धान प्रतिवेदन बुझाएको हो । अनुसन्धान प्रतिबेदनमा आरोपित लामिछानेलाई मुलुकी अपराध संहिता, २०७४ को दफा २ सय १९ बमोजिम १० देखि १२ वर्षसम्म कैद र पीडितलाई ‘यथोचित क्षतिपूर्ति’ भराउन मागदाबी गरिएको छ ।

अनुसन्धानका आधारमा पीडितको उमेर नाबालिग रहेको खुलेको भन्दै प्रहरीले आरोपितलाई सोहीअनुसार कारबाही हुनुपर्ने निष्कर्ष पनि निकालेको प्रहरी स्रोतले दाबी गरेको छ । प्रहरी प्रतिवेदन अध्ययन गरेर सरकारी वकिल कार्यालयले अदालतमा मुद्दा दायरबारे प्रक्रिया थालिने छ ।