काठमाडौं । नेपाली कांग्रेसका वरिष्ठ नेता रामचन्द्र पौडेलले सत्ता गठबन्धन लोकतन्त्र बचाउन बनेको बताएका छन् ।
कामाडौंमा सोमबार आयोजित सत्तागठबन्धनको बागमती प्रदेशस्तरीय भेलालाई सम्बोधन गर्दै वरिष्ठ नेता पौडेलले पाँच दलीय गठबन्धन देशको भविष्यका लागि बनेको दाबी गरे ।
पौडेलले भने, ‘यहाँ मुलुकको सुशासन कायम गर्ने अनुहार छ । व्यवस्था बदलिए पनि अवस्था बदलिएको छैन । हामी अवस्था बदल्नेछौं । व्यवस्था बचाएर हामी मुलुकलाई अगाडि बढाउने छौं ।’ आफूहरूले सत्ता स्वार्थका लागि गठबन्धन नगरेको उनले प्रष्ट पारे ।
पौडेलले हँसिया हथौडाबाट नडराउन कांग्रेस कार्यकर्ताहरुलाई आग्रह गरे । हंसिया हथौडामा लोकतन्त्रको घेरा लागेको जिकिर गर्दै पौडेलले गठबन्धनको उम्मेदवारको चुनाव चिन्ह भनेर भोट हाल्न आग्रह गरे । उनले भने, ‘को कांग्रेस, को माओवादी, को समाजवादीको उम्मेदवार, को राष्ट्रिय जनमोर्चाको उम्मेदवार, को लोसपाको उम्मेदवार – सबै गठबन्धनको उम्मेदवार भनेर जिताउन लाग्नुस्, हँसिया हडौडासँग नडराउनुस, त्यसमा लोकतन्त्रको गोलो घेरा लागेको छ ।’
पौडेलले एमाले अध्यक्ष केपी शर्मा ओलीले अहिलेसम्मका उपलब्धि उल्टाउन खोजेको टिप्पणी समेत गरे ।
प्रतिक्रिया