तोसिमा कार्कीको पक्षमा अन्तरिम आदेश, आयोगको नाममा कारण देखाउ आदेश

काठमाडौं । सर्वोच्च अदालतले ललितपुर क्षेत्र नम्बर ३ की उम्मेदवार तोसिमा कार्कीको उम्मेदवारी कायम राख्न अन्तरिम आदेश जारी गरेको छ । मंगलबार न्यायाधीश कुमार चुडालको इजलासले कार्कीको उम्मेदवारी कायम राख्न अन्तरिम आदेश दिएको हो ।

मेडिकल काउन्सिलको निर्वाचित सदस्य रहेकी डा.तोसिमा कार्की लाभको पदमा रहेको भन्दै निर्वाचन आयोगले उनको उम्मेदवारी खारेज गरेको थियो । आयोगको खारेजी विरुद्ध नियमित तलब भत्ता नलिने भएको कारण उक्त पद लाभको पद नरहेको जिकिर गर्दै कार्कीले सोमबार सर्वोच्च अदालतमा रिट निवेदन दर्ता गराएकी थिइन् । रिट निवेदनमा आयोगको नाममा अन्तरिम आदेशको माग गरिएको थियो ।

मंगलबार पेसीमा चढेको उत्तm रिटमा न्यायाधीश चुडालको इजलासले अन्तरिम आदेश जारी गर्दै विपक्षीहरुका नाममा कारण देखाउ आदेश जारी गरेको छ । सर्वोच्चको आदेशसँगै कार्कीको उम्मेदवारी तत्कालका लागि कायम भएको छ ।

कारण देखाउ आदेशको सुनुवाई भने दुईजना न्यायाधीश रहने संयुक्त इजलासमा हुने छ । विपक्षीहरुले उम्मेदवारी कायम नरहने तथ्य र प्रमाण पेस गर्न सकेमा उनको अन्तरिम आदेश खारेज हुनेछ भने संयुक्त इजलासले समेत अन्तरिम आदेशको निरन्तरता दिउ उनी चुनावी प्रतिस्पर्धामा सहभागी हुन पाउनेछिन् ।