पोखरा । गण्डकी प्रदेशमा एक पछि अर्को मन्त्रीलाई प्रदेश सरकारबाट बर्खास्त गर्न थालिएको छ । मन्त्री हरिशरण आचार्यलाई बर्खास्त गरिएको दुईसाता नपुग्दै प्रदेश सरकारका भौतिक पूर्वाधार विकास मन्त्री कुमार खड्कालाई बर्खास्त गरिएको छ ।
मुख्यमन्त्री कृष्णचन्द्र नेपाली पोखरेलले उनलाई मन्त्रीबाट हटाएका हुन् । प्रतिनिधिसभा र प्रदेशसभा निर्वाचनमा आफ्नो पार्टीका उम्मेदवारलाई असहयोग गरेको आरोप लागेपछि उनलाई मुख्यमन्त्री पोखरेलले बर्खास्त गरेका हुन् ।
प्रदेश प्रमुखको कार्यालयले जारी गरेको सूचनामा भौतिक पूर्वाधार मन्त्रालय मुख्यमन्त्री पोखरेलले नै सम्हाल्ने उल्लेख छ । त्यसअघि मुख्यमन्त्रीले खड्कालाई हटाएको पत्राचार प्रदेश कार्यालयमा गरेका थिए ।
खड्काले कास्की क्षेत्र नं. २ ख बाट टिकटको आकांक्षी रहेका थिए । तर पार्टीले उनलाई टिकट नदिई विन्दुकुमार थापालाई दिएको थियो । त्यसपछि असन्तुष्ट भएका खड्काले थापालाई हराउन लागेको आरोप कांग्रेसकै नेता कार्यकर्ताले लगाएका थिए ।
यसअघि केहीदिन पहिले गोरखामा माओवादी केन्द्रका अध्यक्ष प्रचण्ड विरुद्ध लागेका उर्जामन्त्री हरिशरण आचार्यलाई पनि मुख्यमन्त्री पोखरेलले बर्खास्त गरेका थिए ।
अब गण्डकीमा १० सदस्यीय मन्त्रिपरिषद् छ ।
प्रतिक्रिया