काठमाडौं । प्रतिनिधिसभा र प्रदेशसभा सदस्य निर्वाचनका लागि आज बिहान ७ बजेदेखि मतदान हुँदैछ ।
प्रत्यक्ष मतदानबाट १६५ प्रतिनिधिसभा सदस्य र ३३० जना प्रदेशसभा सदस्य निर्वाचित हुनेछन् । बाँकी भने समानूपातिक पद्धती अन्तर्गत दलले प्राप्त गरेको मतका आधारमा निर्वाचित हुनेछन् ।
प्रतिनिधिससभामा ११० जना समानुपातिक निर्वाचन प्रणालीबाट चयन हुनेछन् । त्यस्तै प्रदेशसभामा २२० जना समानुपातिक पद्धतिबाट निर्वाचित हुनेछन् । प्रतिनिधिसभाको प्रत्यक्षतर्फको १६५ निर्वाचन क्षेत्रमा दुई हजार ४१२ उम्मेदवार छन् ।
देशभर कुल १ करोड ७९ लाख ८८ हजार ५७० मतदाता रहेका निर्वाचन आयोगले जनाएको छ । कुल मतदाताको संख्या अघिल्लो निर्वाचनको तुलनामा करिव १४ प्रतिशत बढी हो ।
निर्वाचन आयोगले आज मतदान गर्नका लागि यस अघि मतदाता परिचयपत्र अनिवार्य भनेपनि त्यसलाई संशोधन गर्दै मतदाता परिचयपत्रको विकल्पमा राहदानी, लालपुर्जा वा सवारी चालक अनुमतिपत्र देखाएर मतदान गर्न पाइने व्यवस्था गरेको छ । शनिबार पत्रकार सम्मेलन गर्दै आयोगले मतदाता परिचय पत्रको विकल्पमा साथमा लिएर जाने परिचय खुल्ने कागजात भने सक्कली हुनु पर्ने जनाएको छ ।
प्रतिक्रिया