बुटवल । नेकपा माओवादी केन्द्रका लुम्बिनी प्रदेश कमिटीका अध्यक्ष सुदर्शन बरालले पदबाट राजीनामा दिएका छन् । मतगणनाको अन्तिम नतिजाहरु आउँदै गर्दा अध्यक्ष बरालले प्रदेशमा माओवादीको सन्तोषजनक नतिजा नआएपछि नैतिकताका आधारमा राजीनामा दिएको बताएका छन् ।
खबरकुरासँग कुरा गर्दै अध्यक्ष बरालले पार्टीको अपेक्षा र आँकलन गरे अनुरुप नतिजा निकाल्न नसकिएपछि आफुले पदबाट राजीनामा दिएको बताए ।
उनले आफ्नो राजीनामामा विभिन्न समस्याका वावजुद विजयी आफ्ना पार्टीका प्रतिनिधि सभा र प्रदेश सभाका विजयी उम्मेदवारहरुलाई बधाई सहित सफल कार्यकालको शुभकामना व्यक्त व्यक्त गरेका छन् । बरालले लाखौं मतदाताहरुको इच्छा र प्रयत्नका वावजुद प्रदेश पार्टीमा समस्याहरु रहेकाले नतिजा अनुकुल हुन नसकेको पनि बताएका छन् ।
प्रदेश सभा समानुपातिक तर्फको उम्मेदवार सूची तयार गर्दा स्थानीय पार्टी कमिटिको भावना र मर्मलाई न्याय गर्न नसकिएको, प्रदेश सभा सदस्य प्रत्यक्ष तर्फका सीट वांडफाड र कतिपय स्थानमा स्थानीय पार्टीको सिफारिस वमोजिम उम्मेदवारलाई टिकट वितरणमा न्याय गर्न नसकिएको, उम्मेद्वार मनोनयन दर्ता भैसकेपछि विभिन्न जिल्लामा देखा परेका समस्या र अन्तरविरोधलाई यथा समयमा सम्वोधन गर्न नसकिएको जस्ता विषयहरु बरालको राजीनामा पत्रमा औंल्याएका छन् ।
‘यस प्रदेशमा पार्टीको विगत परिणामलाई कायम राख्न समेत सकिएन र म स्वयंम उम्मेदवार बनेर पनि परिणाम सफल बनाउन सकिएन । अतः प्रदेश अध्यक्षको हैशियतले उक्त सबै परिणामको नैतिक जिम्मेवारी लिई आजैका मितिबाट अध्यक्ष पदबाट राजीनामा दिएको जानकारी गराउन चाहन्छु ।’ उनले लेखेका छन्, ‘अध्यक्ष पदमा नरहेर पनि अविचलित रुपमा पार्टी र आन्दोलनले सुम्पेको जुन सुकै जिम्मेवारी पूरा गर्ने र शहीदहरुको सामुमा लिएको शपथ कहिल्यै नभुल्ने प्रण गर्दछु ।’
अहिले सम्ममा लुम्बिनी प्रदेशसभाका लागि माओवादी केन्द्रले प्रत्यक्ष तर्फ ४ स्थानमा मात्र सफलता प्राप्त गरेको छ । प्रतिनिधिसभा तर्फ पनि लुम्बिनी प्रदेशमा माओवादीको ४ स्थान हात परेको छ ।
प्रतिक्रिया