काठमाडौं । निर्वाचन आयोगले समानुपातिक निर्वाचन प्रणालीतर्फ दलहरुले पाएको अन्तिम सिटसंख्या सार्वजनिक गरेको छ ।
सोमबार मात्र समानुपातिक मतगणना सम्पन्न गरेको आयोगले सेन्ट लग विधिमार्फत हिसाब निकालेर दलहरुले प्राप्त गरेको अन्तिम सिट संख्या निर्धारण गरेको हो ।
आयोगले प्रतिनिधिसभा र प्रदेशसभा दुवैतर्फको समानुपातिक सिट संख्या सार्वजनिक गरेको छ । जसअनुसार सबैभन्दा ठूलो दल नेकपा एमाले बनेको छ । एमालेले प्रतिनिधिसभामा ३४ र प्रदेशसभामा ७० गरी कुल १०४ सिट प्राप्त गरेको छ ।
यसैगरी दोस्रो स्थानमा रहेको नेपाली कांग्रेसले प्रतिनिधिसभातर्फ ३२ र प्रदेशसभातर्फ ६४ सिट गरी ९६ सिट हासिल गरेको छ ।
तेस्रो स्थानमा रहेको नेकपा माओवादी केन्द्रले प्रतिनिधिसभामा १४ प्रदेशसभामा २९ गरी कुल ४३ सिट जितेको छ ।
प्रदेश सभामा उसले उम्मेदवारी नदिएको राष्ट्रिय स्वतन्त्र पार्टीले प्रतिनिधिसभा १३ सिट पाएको छ।
राष्ट्रिय प्रजातन्त्र पार्टीले प्रतिनिधिसभामा ७ सिट जितेको छ भने प्रदेशसभामा १७ सिट जितेको छ ।
यस्तै एकीकृत समाजवादीले प्रदेशसभामा ९ सिट हासिल गरेको छ । तर यो पार्टीले प्रतिनिधिसभामा तीन प्रतिशतको थ्रेसहोल्ड कटाउन नसकेपछि सिटबिहीन बनेको छ ।
जनता समाजवादी पार्टी र जनमत पार्टीले प्रतिनिधिसभामा समान ५ सिट जितेको छ भने प्रदेशसभातर्फ पनि ९ ९ सिट जितेका छन् । नागरिक उन्मुक्ति पार्टीले प्रदेसभामा ५ सिट जितेको छ । नेपाल मजदुर किसान पार्टीले प्रदेशभामा २ सिट जितेको छ ।
लोकतान्त्रिक समाजवादी पार्टीले प्रदेशसभामा ३ सिट जितेको छ । यस्तै, नेपाल संघीय समाजवादी, राष्ट्रिय जनमोर्चा र हाम्रो नेपाली पार्टीले पनि प्रदेशभामा खाता खोल्न सफल भएका छन् ।
प्रतिक्रिया