समानुपातिक सांसदको नाममाथि छानबिन सुरु, सोमबार निर्वाचित भएको घोषणा हुने

काठमाडौं । निर्वाचन आयोगले दलहरुलाई समानुपातिक सांसदहरुको सूची सच्याउन सुरु गरेको छ ।

दलहरुलाई शनिबार अपरान्ह ४ बजेसम्म समानुापातिक सांसदहरुको नाम बुझाउन समय दिएको आयोगले सांसदहरुको नाम सच्चाउन भोलि सोमबारसम्मको समय दिएको हो । समानुपातिक सिद्धान्तअनुसार समावेशी सूची नमिलेको नाम सच्चाउन आयोगले आज र भोलिको समय दिएको हो ।

यसअघि दलहरुले आयोगलाई बुझाएको बन्द सूचीमा उल्लेख भएको नामावलीभित्रबाट समावेशी सूचीलाई आधार मान्दै दलहरुले सांसद छान्नुपर्छ । यो नियमलाई तलमाथि गर्न पाई्रंदैन । यसैमा सांसदहरुको सूची नमिलेको भए मिलाउनका लागि आयोगले दलहरुलाई समय दिएको हो ।

आयोगले छानविन गरेर सांसदहरुको नाम प्रमाणित गरेपछि मात्रै औपचारिक रुपमा समानुपातिक सांसदहरुले मान्यता पाउँछन् । आयोगले पहिला दलहरुले बुझाएको बन्दसूचीभित्रबाट नाम परे नपरेको, समावेशी सूचीअनुसार महिला, दलित, अल्पसंख्यक, पिछडिएको वर्ग लगायतको प्रतिनिधित्व भए नभएको छानविन गर्छ । यो छानविन सकिएपछि भोलि नै समानुपातिक सांसदहरु निर्वाचित भएको घोषणा गर्ने तयारी आयोगले गरेको छ ।