बाँकेमा दादुरा महामारी : संक्रमितको संख्या ९२ पुग्यो, खजुरामा पनि भेटियो दादुरा

नेपालगन्ज । नेपालगन्जमा फैलिएको दादुरा महामारीबाट संक्रमित हुने बालबालिकाको संख्या ७६ पुगेको छ । नेपालगन्ज उपमहानगरपालिकाका २३ वटा वडामध्ये ११ वटा वडामा दादुरा माहामारी फैलिसकेको उपमहानगरपालिकाको स्वास्थ्य महाशाखाले जनाएको छ ।

पुस १२ गतेबाट देखिएको दादुरा संक्रमणबाट नेपालगञ्ज उपमहानगरपालिकाका वडा नं. १, २, ५, ७, ८, ९, १०, ११, १४, १५ र २२ मा गरी ७६ जनामा संक्रमण देखिएको नेपालगञ्ज उपमहानगरपालिकाका स्वास्थ्य महाशाखा प्रमुख रामबहादुर चन्दले बताएका छन् ।

दादुराबाट ५ नम्बर वडाका ३१ महिने एक बालकको मृत्यु भइसकेको छ । संक्रमित बालबालिकालाई होम आइसोलेसनमा राखेर उपचार भइरहेको महाशाखाले जनाएको छ । बढी संक्रमित तीनवटा वडामा दादुरा रुबेलाविरुद्धको खोप अभियान सुरु गरिएको छ ।

संक्रमित हुनेमा अधिकांश पूर्ण खोप नलगाएका बालबालिका रहेकाले संक्रमण फैलिएका सबै वडामा खोप कार्यक्रम सञ्चालन गरिने चन्दले बताए । नेपालले सन् २०२३ को अन्त्यसम्म दादुरा निवारण गर्ने लक्ष्य लिएको छ ।

खजुरामा पनि भेटियो दादुरा संक्रमित

बाँकेको नेपालगन्जमा फैलिएको दादुरा महामारी नेपालगन्ज उपमहानगर बाहिर पनि फैलन थालेको छ । आज खजुरा गाउँपालिकाका बालबालिकामा पनि दादुरा देखापरेको छ । एक साताअघि नेपालगञ्ज–७ का चार जना बालबालिकामा देखिएको दादुरा आज खजुरामा पनि देखा परेको हो ।

खजुरा गाँउपालिका वडा नम्बर २ गुराँसपुरका २ जना बालकमा दादुरा संक्रमण भेटिएको स्वास्थ्य कार्यालय बाँकेका अधिकृत नरेशबाबु श्रेष्ठले बताए । उनले सोमबार सम्म बाँकेमा ९२ जनामा संक्रमण फैलिएको जनाउँदै जिल्लाका अन्य स्थानमा पनि संक्रमित भेटिन थालेको बताए ।

दादुरा तीव्र गतिमा फैलिरहेको पाइएको जनाउँदै उनले नियन्त्रणका लागि रोकथाम अभियानलाई पनि तीव्र पारिएको बताए । खोप फोकल पर्सनसमेत रहेका अधिकृत श्रेष्ठले दादुरा फैलिएपछि खोप अभियानलाई तीव्र पारिएको जानकारी दिए ।