बुटवल । बुटवलमा निर्वाचित वडाध्यक्षसहित ५५ जना युवा नेकपा एमालेमा समाहित भएका छन् । तत्कालीन नेकपा (एकीकृत समाजवादी)बाट बुटवल उपमहानगरपालिका-२ का वडाध्यक्षमा निर्वाचित सुनिल शाक्यसहितका युवाहरू एमालेमा प्रवेश गरेका हुन् ।
उनीहरूलाई एमाले उपाध्यक्ष तथा रुपन्देही क्षेत्र नम्बर-२ का प्रतिनिधिसभा सदस्य उम्मेदवार विष्णु पौडेलले स्वागत गरेका छन् । एमालेका अनुसार विभिन्न राजनीतिक दलमा आबद्ध युवा नेताहरू मुलुकको विकास र समृद्धिको अभियानलाई अघि बढाउन पौडेलको नेतृत्वलाई समर्थन गर्दै एमालेमा प्रवेश गरेका हुन् ।
एमालेका युवा नेता तथा रुपन्देही क्षेत्र नम्बर-२ निर्वाचन परिचालन समिति सह-संयोजक राजु गुरुङको पहलमा वडाध्यक्ष शाक्यसहित शंकर घर्ती, विक्रम बस्याल, सुमन गुरुङ, प्रवेश सुनार, राजु क्षेत्री, आकाश गुरुङ, झविन गौतम, धनसिंह खाम्चाललगायतका युवा एमालेमा समाहित भएका छन् । उनीहरूले क्षेत्रको दीर्घकालीन विकास र समृद्धिका लागि विष्णु पौडेलको नेतृत्व आवश्यक रहेको भन्दै समर्थन जनाएका छन् ।
नवप्रवेशी युवाहरूले पौडेलको नेतृत्वमा क्षेत्रको समग्र विकास सम्भव हुने विश्वास व्यक्त गर्दै उनलाई विजयी गराउने अभियानमा सक्रिय रूपमा लाग्ने प्रतिबद्धता जनाएका छन् । साथै, युवाहरूले राष्ट्रिय राजनीतिमा महत्वपूर्ण भूमिका निर्वाह गर्न सक्ने नेतृत्वका रूपमा पौडेललाई अगाडि बढाउनुपर्ने धारणा पनि व्यक्त गरेका छन् ।
एमाले उपाध्यक्ष पौडेलले युवाहरूको प्रवेशले पार्टीलाई थप ऊर्जा र उत्साह प्रदान गरेको उल्लेख गर्दै विकास, समृद्धि र स्थायित्वका लागि एमालेप्रति जनविश्वास बढ्दै गएको बताए । उनले एमाले परिवारमा पुनर्मिलन भएका तथा नयाँ रूपमा जोडिएका युवाहरूको साथले आफू थप उत्साहित भएको बताए ।
युवा नेता राजु गुरुङले नवप्रवेशी युवामार्फत आगामी दिनमा कम्तीमा ५ सय युवा एमालेमा जोडिने दाबी गर्दै सामाजिक सञ्जालमा फैलाइएका भ्रमबाट प्रभावित नहुन र फराकिलो जित सुनिश्चित गर्न सक्रिय रूपमा लाग्न युवाहरूलाई आग्रह गरेका छन् ।
प्रतिक्रिया