काठमाडौं । प्रधानमन्त्री पुष्पकमल दाहाल ‘प्रचण्ड’ले प्रतिनिधि सभामा विश्वासको मत माग्दै सबै मिलेर अघाडि बढ्नु पर्नेमा जोड दिएका छन् ।
मंगलबार प्रतिनिधि सभाको बैठकमा विश्वासको मत माग्दै प्रधानमन्त्री प्रचण्डले लोकतान्त्रिक र वामपन्थी शक्तिहरु नै मिलेर देशमा परिवर्तन भएको बताए । उनले १०४ वर्षे राणा शासन र राजतन्त्रको अन्त्य पनि सहमति र सहकार्यमार्फत भएको बताए ।
‘हामी मिल्दा देश अघाडि गएको छ । नमिल्दा देश संकटतर्फ गएको छ’, उनले भने । उनले राष्ट्रिय एकताका साथ अघि बढ्ने बताए ।
‘आज परिस्थितिवश तेस्रोपटक प्रधानमन्त्रीको रुपमा विश्वासको मतका लागि अनुरोध गर्न यो सम्मानित सदनको रोस्ट्रममा उभिएको छु। मैले भनी नै हालेँ, म यसपल्ट फरक संकल्पका साथ संसद् सामु उभिएको छु’, उनले भने ।
प्रचण्ड गत पुस १० गते प्रधानमन्त्री नियुक्त भएका थिए । उनले ११ गते शपथ लिएका थिए। प्रधानमन्त्री नियुक्त भएको तीस दिनभित्र विश्वासको मत लिनुपर्ने संवैधानिक प्रावधान छ ।
एमालेको प्रमुख सहयोगमा प्रधानमन्त्री भएका उनले कांग्रेस लगायतका दलहरुबाट पनि विश्वासको मत पाउने भएका छन् ।
प्रतिक्रिया