मर्चवारमा गोली चल्यो, एक भारतीय सहित ३ जना प्रहरीको नियन्त्रणमा

बुटवल । रुपन्देहीको दक्षिणी क्षेत्र मर्चवारमा गोली चलेको छ । सीमापारिबाट सामान ओसारपसार गर्नेहरुले गोली चलाएको बताइएपनि प्रहरीले त्यसको पुष्टी गरेको छैन ।

बिहिबार राती केही पड्केको आवाज आएको र घटनास्थलमा एक थान गोलीको खोका फेला परेको जिल्ला प्रहरी कार्यालय रुपन्देहीका प्रवक्ता श्यामु अर्यालले बताएका छन् । उनले करिब ७ बजे गोली चलेको पुष्टी गरे । कोटहीमाइ गाउपालिका वडा नम्बर ३ पर्सियामा तस्करी रोक्न सक्रिय रहेको प्रहरीलाई तर्साउनको लागि हवाइ फायर गरिएको अनुमान गरे ।

डीएसपी अर्यालले एकजना भारतिय र २ जना नेपाली नागरिकलाई पक्राउ गरिएको र उनीहरुबाट भारतिय नम्बर प्लेटको १ थान र नेपाली नम्बर प्लेटको १ थान मोटरसाईकल पनि बरामद भएको बताए । घटनामा संलग्न अन्यको पनि नाम आएकाले अनुसन्धानका पछि मात्र पक्राउ परेकाहरुको नाम सार्वजनिक गरिने उनले बताए ।

गोली चलेको स्थान नेपाल(भारतको सीमा क्षेत्र हो । गोली चलेको पर्सिया लगायत त्रीलोकपुर, कदमहवाबाट भारतबाट अवैध चोरी निकासी हुने गरेको छ ।