नेपालगन्ज । नक्कली नोट छाप्ने मसिन बरामद भएको एक महिना पछि नै बाँकेको नेपालगन्जबाट ठुलो परिमाणमा नक्कली नोट फेला परेपछि नेपालगन्ज र त्यस आसपासका क्षेत्रमा नक्कली नोटको बिगबिगी रहेको खुलासा भएको छ । पैसा छाप्ने मसिन फेला परेपछि नक्कली नोटको खोजीमा सक्रियता देखाएको प्रहरीले बुधबार मात्र पाँच लाख बढी नक्कली नोट फेला पारेपछि नक्कली नोटको बिगबिगीको पुष्टी भएको हो ।
बुधबार मात्र बाँके प्रहरीले नक्कली एक हजार रुपियाँका पाँच लाख ६९ हजार रुपैयाँसहित तीन जनालाई पक्राउ गरेको छ । एकै पटक यति धेरै नक्कली रुपियाँ बरामद गरिएपछि जिल्लामा नक्कली नोट धेरै बढी हुनसक्ने अनुमान प्रहरीको छ ।
माघको पहिलो साता प्रहरीले नेपालगन्जको धम्बोझी स्थित पाहुनाघरको एक कोठामा नक्कली नोट छाप्ने मसिन नै फेला पारेको थियो । पुस २९ गतेदेखि होटेलमा बसेका एक व्यक्तिले होटेलमा बसेर नक्कली नोट छपाइ गरेको भेटिएको थियो । ३० गतेसम्म होटेलमा आउने र जाने गरेका ती व्यक्ति दुई दिनसम्म नदेखिएपछि होटेल सञ्चालकले प्रहरीलाई खबर गरेका थिए । प्रहरीले गएर कोठामा हेर्दा ५० रुपैयाँका केही थान नक्कली नोटसहित पैसा छाप्ने प्रिन्टर बरामद गरेको थियो । फरार रहेका ती व्यक्तिको प्रहरीले खोजी गरिरहेको बेला फेरि नक्कली नोट फेला परेको हो ।
नेपालगन्ज–२ न्यूरोडमा शङ्कास्पद अवस्थामा हिँडिरहेको बेला खानतलासी गर्दा तीन जनाबाट नक्कली एक हजारका ५६९ वटा नक्कली नोट बरामद भएको पत्रकार सम्मेलन गर्दै बाँके प्रहरीले जानकारी दिएको छ ।
कोहलपुर नगरपालिका–११ का ३३ वर्षीय मोहन कुमाईं, अछामको तुर्माखाँद गाउँपालिका–३ का ३० वर्षीय दीपक बिसी र सल्यानको नवगाड कुपिन्डे नगरपालिकाका ३० वर्षीय मोहन रानाको खानतलासी गर्दा उनीहरूले बोकेको झोलाबाट सो नक्कली रुपैयाँ बरामद भएको जिल्ला प्रहरी कार्यालय बाँकेका प्रमुख एसपी सन्तोष सिंह राठौरले बताए ।
पक्राउ परेका मोहन रानाका साथबाट ४१८ ओटा नक्कली नेपाली एक हजारको नोट (४ लाख १८ हजार) र मोहन कुमाईंको साथबाट १५१ ओटा नक्कली नेपाली एक हजारको (एक लाख ५१ हजार) गरी कुल ५६९ ओटा एक हजारका नक्कली नेपाली रुपियाँ बरामद भएको उनले बताए ।
छाप्ने मसिन बरामद भएदेखि नै नक्कली नोटको खोजी गर्न थालेको प्रहरीले नक्कली नेपाली रुपियाँ बोकेर हिँडी रहेका गोप्य सूचनाको अधारमा उनीहरुलाई पक्राउ गरिएको जनाएको छ ।
प्रहरी प्रवक्ता डिएसपी रामप्रसाद घर्तीमगरले यति धेरै नक्कली नोट कहाँबाट कसरी ल्याइएको हो भन्नेबारे प्रहरीले विशेष टिम नै खटाएर थप अनुसन्धान गरिरहेको बताए । उनले व्यवसायीलाई नगद कारोबार गर्दा नोटको लाईनिङ र गुणस्तर हेरेर मात्र कारोबार गर्न आग्रह गर्दै शंस्पद नोट फेला परे प्रहरीलाई खबर गर्न आग्रह गरे । ‘हतार नगरि राम्रोसँग हेर्ने हो भने सजिलै नक्कली नोट चिन्न सकिन्छ ।’ उनले भने ।
प्रतिक्रिया