काठमाडौं । शुक्रबार नेपाली सिनेमा हलहरुमा एक नेपाली र दुई विदेशी फिल्म प्रदर्शनमा आएका छन् । नेपाली फिल्मतर्फ ‘फूलबारी’ र विदेशी फिल्मतर्फ बलिउड फिल्म ‘शेहजादा’, हलिउड फिल्म ‘एन्ट-म्यान एण्ड द वास्प: क्वान्टुमेनिया’ रिलिज भएका हुन् ।
रामबाa’ गुरुङ निर्देशित ‘फूलबारी’ ले पारिवारिक कथावस्तुलाई समेटेको छ । यस फिल्ममा विपिन कार्की, अरुणा कार्की, प्रियंका कार्की, दयाहाङ राई, गौमाया गुरुङ, शिल्पा मास्के, अनुपम शर्मा, सोमनाथ खनाल, मनिष ढकाल, लोकेन्द्र लेखक लगायतका कलाकारको अभिनय छ ।
यशोदा फिल्म्स प्रोडक्सनको ब्यानरमा निर्माण हुने फिल्मका निर्माता मनिष ढकाल हुन् । कमल किशोर मलपानीको कथा र ‘कन्सेप्ट’ रहेको फिल्मको पटकथा उपेन्द्र सुब्बाले लेखेका हुन् । बिहीवार भएको प्रिमियर शोमा यस फिल्मलाई सकरात्मक प्रतिक्रिया मिलेको छ ।
त्यसैगरि, कार्तिक आर्यनको मुख्य भूमिका रहेको ‘शेहजादा’ पनि हलमा रिलिज भएको छ । रोहित धवन निर्देशित यस फिल्ममा कार्तिकका साथै कृति सेनन र मनिषा कोइरालाको पनि मुख्य भूमिका रहेको छ ।
फिल्म ‘शेहजादा’ अल्लु अर्जुन, पूजा हेगडे स्टारर फिल्म ‘अला बैकुण्ठपुरमलो’ को हिन्दी रिमेक हो । कमेडी एक्सन जनरामा बनेको फिल्मले दुई बच्चा जन्मदै साटिएको र धनी परिवारको शिशु गरिब परिवारमा साटिदाँ ल्याउने उतारचढावको कथालाई समेटिएको छ ।
आजबाट रिलिज भएको हलिउड फिल्म ‘एन्ट- म्यान’ एक्सन, एडभेन्चर र कमेडी जनरामा निर्माण भएको हो । मार्भल स्टुडियोको बनाएको यस फिल्मलाई पेटन रीडले निर्देशन गरेका हुन् । फिल्ममा पल रुड र इवांगेलिन लिलीको मुख्य भूमिका छ ।
प्रतिक्रिया