काठमाडौँ । राष्ट्रपति पद एमालेले नपाउने निश्चित जस्तै बनेपछि एमालेले सरकारबाट बाहिरिने तयारी गरेको छ । प्रधानमन्त्री प्रचण्डलाई राष्ट्रपतिमा एमाले उम्मेदवारलाई समर्थन नगरे सरकार छाड्ने चेतावनी दिएर बालुवाटारबाट निस्केका एमाले अध्यक्ष केपी शर्मा ओलीले शनिबार बस्ने सचिवालय बैठकबाट निर्णय गराएर सरकारबाट बाहिरिने तयारी गरेको छ ।
शुक्रबार दिउँसो प्रचण्ड र ओलीबीच भएको छलफलमा सहमति नजुटेसँगै ओलीले सरकारबाट एमाले बाहिरिने कुरा माओवादी केन्द्रका अध्यक्ष समेत रहेका प्रचण्डलाई सुनाएर बालुवाटारबाट निस्केका थिए ।
ओलीले सरकार छाड्ने जानकारी दिएको कुरा प्रधानमन्त्री प्रचण्डले ७ दलको साँझ बसेको बैठकमा जानकारी दिएका थिए ।
भोलि बस्ने तय भएको सचिवालयको बैठकबाट एमाले सरकारबाट बाहिरिने निर्णय गर्ने आंकलन गरिएको छ ।
एमाले उपमहासचिव प्रदीप ज्ञवालीले शुक्रबार प्रदेश नमबर १ को एक कायृक्रममा आठ दलले गरेको सहमतिले मुलुकलाई थप राजनीतिक अस्थिरतातर्फ धकेल्ने र त्यसले राजनीतिक कोर्स परिवर्तन हुन सक्ने बताएका थिए । आगामी दिनमा कसरी अघि बढ्ने भन्नेबारे शनिबारको बैठकले निर्णय गर्ने पनि उनले बताएका थिए ।
सरकारमा रहेका अन्य दल राप्रपा र राष्ट्रिय स्वतन्त्र पार्टी (रास्वपा)सँग प्रधानमन्त्रीले भोलि बिहान निर्णायक छलफल गर्ने तय भएको बालुवाटार स्रोतले जनाएको छ ।
बिहीबार बसेको आठ दलको बैठकले राष्ट्रपति पदमा नेपाली कांग्रेसका उम्मेदवारलाई समर्थन गर्ने सहमति गरेको छ ।
प्रतिक्रिया