काठमाडौं । काठमाडौं उपत्यका बाहिर स्थायी ठेगाना भएर काम विशेषले काठमाडौं उपत्यकामा बसिरहेका नेपाली नागरिकले अव राष्ट्रिय परिचयपत्र बनाउन गृहजिल्ला जान नपर्ने भएको छ । उपत्यका बाहिर ठेगाना भएका नागरिकहरूका लागि सरकारले राष्ट्रिय परिचयपत्र विवरण दर्ता गर्न उपत्यका भित्रै व्यवस्था मिलाइदिएपछी उनीहरुलाई परिचयपत्र बनाउन गृहजिल्ला जान नपर्ने भएको हो ।
राष्ट्रिय परिचयपत्र तथा पञ्जीकरण विभागले बुधबार एक सूचना जारी गर्दै काठमाडौं र ललितपुरमा गरी विभिन्न पाँच स्थानमा परिचयपत्र विवरण दर्ता केन्द्र स्थापना गरिएको जनाएको छ ।
हाल देशभरका ७७ वटै जिल्ला प्रशासन कार्यालय, ४२ वटा इलाका प्रशासन कार्यालय, नारायणहिटी दरबार तथा विवरण दर्ता अभियान सञ्चालन भइरहेका स्थानहरूबाट राष्ट्रिय परिचयपत्रको विवरण दर्ता गर्न सकिन्छ।
उपत्यका बाहिर ठेगाना भएका सेवाग्राहीहरूलाई मध्यनजर गर्दै अत्यावश्यक पर्दा सहजता प्रदान गर्न सरकारले उपत्यका भित्र परिचयपत्र विवरण दर्ता केन्द्र तोकेको हो। विभागले अत्यावश्यक पर्दा बाहेक सकेसम्म आ(आफ्नो स्थायी ठेगाना भएका जिल्ला प्रशासन तथा इलाका कार्यालयहरूबाट नै विवरण दर्ता गराउन अनुरोध गरेको छ ।
सरकारले तोकेको दर्ता स्थानमध्ये जिल्ला प्रशासन कार्यालय, काठमाडौंमा बागमती प्रदेशका ललितपुर र भक्तपुर ठेगाना भएका बाहेक सबै जिल्ला तथा मधेश प्रदेशका पर्सा र धनुषा जिल्लाका सेवाग्राहीहरूले विवरण दर्ता गर्न सक्नेछन् भने जिल्ला प्रशासन कार्यालय, ललितपुरमा कर्णाली प्रदेश र सुदूर(पश्चिम प्रदेशका सबै तथा मधेश प्रदेशका सप्तरी र सर्लाही जिल्लाका सेवाग्राहीहरूले राष्ट्रिय परिचयपत्रको विवरण दर्ता गर्न सक्नेछन्।
त्यस्तै नारायणहिटी दरबार परिसरमा स्थापित विवरण दर्ता स्थानमा कोशी, लुम्बिनी र गण्डकी प्रदेशका सबै जिल्ला र मधेश प्रदेशको सिराहा, महोत्तरी, बारा र रौतहट जिल्लाका सेवाग्राहीहरूले राष्ट्रिय परिचयपत्रको विवरण दर्ता गर्न सक्नेछन्।
राष्ट्रिय परिचयपत्र तथा पञ्जीकरण विभागको दर्ता स्थानबाट भने नेपाल सरकार तथा मातहतका कर्मचारी, पूर्व कर्मचारी तथा विशिष्ट पदाधिकारीहरू सेवा लिन सक्नेछन्। उता प्रदर्शनी मार्गमा रहेको राष्ट्रिय सभागृहमा खोलिएको विवरण दर्ता केन्द्रबाट राष्ट्रसेवक कर्मचारीका परिवारका सदस्यले परिचयपत्र दर्ता सेवा लिन सक्ने सूचनामा उल्लेख छ ।
प्रतिक्रिया