काठमाडौं । राष्ट्रपति र उपराष्ट्रपति निर्वाचनमा मतदान गर्ने मतदाताले मतदान गर्न परिचय पत्र अनिवार्य बोक्नु पर्ने भएको छ । निर्वाचन आयोगले आज एक सूचना जारी गर्दै मतदाताहरुलाई परिचयपत्र अनिवार्य लिएर आउनुपर्ने जनाएको छ ।
आयोगले जारी गरेको सूचना अनुसार राष्ट्रपति र उपराष्ट्रपतिको निर्वाचनमा सङ्घीय संसदका सदस्य र प्रदेश सभाका सदस्य रहेकाहरुले मतदान गर्नुपर्ने कानुनी व्यवस्था अनुसार दुबै निर्वाचनमा निर्वाचन अधिकृतको कार्यालयबाट प्रकाशित अन्तिम मतदाता नामावलीमा नाम समावेश भएका मतदाताहरूले मात्र मतदान गर्न पाउने छन् ।
मतदान गर्न जाँदा निर्वाचन आयोगबाट जारी भएको मतदाता परिचय पत्र वा, नेपाली नागरिकताको प्रमाण पत्र वा, सम्बन्धित संसद सभा सचिवालयबाट जारी भएको परिचय पत्र वा, निर्वाचन अधिकृतबाट सम्बन्धित सभाको सदस्यमा निर्वाचित हुँदा उपलब्ध गराइएको प्रमाण पत्र वा राष्ट्रिय परिचय पत्र साथमा लिएर जानु पर्ने आयोगले जनाएको छ । उल्लेखित परिचय खुल्ने प्रमाणपत्र नभएकाहरुले मतदान गर्न नपाउने आयोगका प्रवक्ता शालिग्राम शर्माले बताए ।
फागुन २५ गते हुने राष्ट्रपतिको निर्वाचन र ३ गते हुने उपराष्ट्रपतिको निर्वाचन हुने गरि आयोगले निर्वाचन प्रक्रिया सुरु गरिसकेको छ ।
प्रतिक्रिया