खजुरा । लामो समयदेखि निर्माण अलपत्र रहेको नेपालगन्ज–गुलरिया सडक खण्डको खजुरामा अलपत्र सडकमा स्थानीयको लगातारको दवाव पछि ठेकेदार कम्पनी देखा परेका छन् । गाँउपालिकाले संघीय भौतिक पूर्वाधार मन्त्री नारायणकाजी श्रेष्ठलाई अलपत्र सडकमा बोलाएर सडकको कन्तबिजोग देखाएपछि मन्त्रीको दवावमा ठेकेदार कम्पनी कार्यक्षेत्रमा देखिएको हो ।
खजुरा गाउँपालिका अध्यक्ष डम्बर विक तुफानको पहल तथा खजुरा क्षेत्र संरक्षण समिति सहित स्थानीयको दवाव सहितको आन्दोलनको चेतावनी पछि अध्यक्ष विकको आग्रहमा संघीय मन्त्री श्रेष्ठ अघिल्लो महिना खजुराको सडक अनुगमन गर्न पुगेका थिए ।
नेपालगन्ज गुलरिया सडक खण्डको खजुरा बजारको १८ सय मिटर बाटो निर्माण अलपत्र छाडेर ठेकेदार कम्पनी बेपत्ता भएपछि स्थानीयले विगत ४ वर्षदेखि सास्ती व्यहोर्दै आएका छन् ।
२०७४ सालमा इलामको गजुरमुखी निर्माण कम्पनीले २०७७ सालमा योजना सम्पन्न गर्नेगरि ठेक्का लिएको थियो । ३ पटक म्याद थप गर्दापनि ठेकेदारले बेवास्ता गरेपछि स्थानीय आन्दोलित भएका थिए ।
ठेकेदार कम्पनी कार्यक्षत्रमा देखा परेपनि काम सम्पन्न गर्नेमा आशंका रहेको स्थानीय व्यवसायी रोसन सापकोटाले बताए । थोरै काम गर्ने र काम गरेको भन्दा धेरै पैसा निकालेर जाने ठेकेदारको प्रवृत्ति रहेकाले विश्वास गर्न नसकिने उनले बताए ।
स्थानीयबासी र सञ्चारकर्मीको लगातारको खबरदारीका कारण सडकको काम सुरु गराउन सफल भइएको खजुरा गाँउपालिकाका अध्यक्ष डम्बर विकले बताए । उनले ठेकेदार कम्पनीले १५ दिनमा काम सम्पन्न गर्ने प्रतिबद्धता जनाएको उल्लेख गर्दै पालिकाले काम सम्पन्न गराउन सक्रिय पहल गर्ने बताए ।
सडक डिभिजन कार्यालय नेपालगन्जले अनुगमन र निरिक्षण गर्ने गरि ३० करोड ३६ लाख लागत अनुमान गरिएको बर्दिया र बाँकेको गरि ४ किलोमिटर सडकलाई २१ करोड ४९ लाखमा ठेकेदार कम्पनीले गजुरमुखी निर्माण सेवाले ठेक्का कबुल गरेको थियो । सम्झौता अनुसार सडक बिचमा ग्रीन डिभाईडर र सडकको दुबै किनारमा नाली बनाउनु पर्ने थियो । तर ठेकेदार कम्पनीले खजुराको मुख्य बजारको बिचभाग सम्म नाली बनाएर काम रोकेपछि बजार क्षेत्र नै दुर्गन्धित बनेको छ ।
खजुरा बजार क्षेत्रको सडकको सडक दुर्घटनाको जोखिमको साथै धुँलोको कारण स्वास्थ्यमा पर्ने असरका साथै व्यवसायमा समेत असर परेको थियो ।
प्रतिक्रिया