काठमाडौं । प्रधानमन्त्री पुष्पकमल दाहाल प्रचण्डले चैत ६ गते प्रतिनिधिसभाबाट विश्वासको मत लिने भएका छन् ।
विश्वासको मत लिने व्यवस्था मिलाइदिन प्रधानमन्त्री प्रचण्डले बिहीबार संघीय संसद् सचिवालयलाई पत्र पठाएका छन् । चैत ६ गते प्रतिनिधिसभाको बैठकको कार्यसूचीमा विश्वासको मत लिने एजेन्डा समावेश गरिदिन प्रधानमन्त्रीले पत्र पठाएको संसद सचिवालयले जनाएको छ ।
गत पुस १० गते एमालेसहितका दलहरुको समर्थनमा प्रधामन्त्री बनेका प्रचण्डले पुस २६ गते विश्वासको मत लिएका थिए । त्यतिबेला ९९ प्रतिशत सांसदको विश्वासको मत प्राप्त गरेका प्रचण्डलाई समर्थन गरेका एमाले र राप्रपाले आफ्नो समर्थन फिर्ता गरेपछि पुनः विश्वासको मत लिने निर्णयमा पुगेका हुन् ।
प्रचण्डलाई माओवादीबाहेक नयाँ सत्ता गठबन्धनमा रहेका नेपाली कांग्रेस, जनता समाजवादी पार्टी, एकीकृत समाजवादी, लोकतान्त्रिक समाजवादी पार्टी, नागरिक उन्मुक्ति पार्टी, जनमत पार्टीलगायतले समर्थन गरिरहेका छन् ।
प्रतिक्रिया