हत्या अभियोगमा फरार सांसद लक्ष्मी महतो कोइरी निलम्बित

काठमाडौं । हत्या अभियोगमा फरार रहेका सांसद लक्ष्मी महतो कोइरी निलम्बित भएका छन् । सभामुख देवराज घिमिरेले नेकपा एमालेका सांसद कोइरीलाई निलम्बन गरेका हुन् । सचिवालयले मंगलबार सूचना टाँसेर कोइरीको सा‌ंसद पद निलम्बनमा परेको जानकारी दिएको छ।

यसअघि प्रहरीले कोइरी फरार रहेको पत्र पठाए संसद सचिवालयमा पठाएको थियो । प्रतिनिधिसभा नियमावलीको नियम २४८ (३) बमोजिम उनलाई निलम्बन गरिएको संसद सचिवालयले जनाएको छ ।

कोइरी मधेश आन्दोलनका क्रममा सात वर्षअघि महोत्तरीमा नेपाल प्रहरीका सई थमन विश्वकर्मा हत्याका मुख्य आरोपी हुन् । उनलाई जनकपुर उच्च अदालतले पक्राउ गर्न आदेश दिएको थियो । तर राजनीतिक शक्तिको आडमा कोइरी पक्राउ पर्नबाट जोगिँदै आएका थिए । गत प्रतिनिधिसभा निर्वाचनमा उनी महोत्तरीबाट निर्वाचित भएका थिए ।