काठमाडौं । मिटरब्याजलाई अनुचित लेनदेन मान्ने विधेयक प्रतिनिधिसभाले सर्वसम्मत पारित गरेको छ । आइतबार बसेको प्रतिनिधिसभाको बैठकले मुलुकी संहितासम्बन्धी केही नेपाल ऐनलाई संशोधन गर्ने विधेयक–२०८० सर्वसम्मत पास गरेको हो ।
संसदबाट सर्वसम्मत विधेयक पास गर्ने क्रममा सरकारले कारोबार भएको वास्तविक रकम र कानुन बमोजिम ब्याज दिलाउने विषयमा विधेयकमा संशोधन गर्न स्वीकार गरेसँगै विधेयक सर्वसम्मत पास भएको हो ।
राष्ट्रियसभाबाट यस अघि नै पारित भइसकेको यो विधेयक प्रतिनिधिसभाले पारित गरेपछि अब पुनः राष्ट्रिय सभामा जानेछ । प्रतिनिधिसभाले गरेको संशोधन राष्ट्रिय सभाले स्वीकार गरेपछि प्रमाणीकरणका लागि राष्ट्रपतिकहाँ पठाइनेछ । दुबै सदनले पास गरेको सो विधेयक राष्ट्रपतिले प्रमाणीकरण गरेपछि कानुन बन्ने छ ।
मिटरब्याजलाई अनुचित लेनदेन मानेर कारवाहीका लागि कानुनी दायरामा ल्याउन सरकारले २० वैशाखमा अध्यादेश ल्याएको थियो । संवैधानिक र कानुनी व्यवस्थाअनुसार प्रतिस्थापन विधेयक २० असारभित्र पारित गरिसक्नुपर्ने भएपनि एमाले र राीवपाले संसद अवरुद्ध पारेपछि सो विधेयक निश्क्रिय बनेको थियो ।
२० असारमा पारित गर्ने कार्यसूची राखिएपनि प्रधानमन्त्री पुष्पकमल दाहाल प्रचण्डको विवादास्पद अभिव्यक्ति दिएको भन्दै एमाले, राष्ट्रिय स्वतन्त्र पार्टी र राप्रपाले संसद अवरुद्ध गरेका थिए ।
प्रतिक्रिया