नेपालगन्ज । बाँकेमा यस वर्ष रासायनिक मलको अभाव नहुने दाबी गरिएको छ । हरेक वर्ष मल अभावका कारण चोरी पैठारी गर्न बाध्य हुँदै आएका बाँकेका किसानहरु मल अभाव नहुने खबरले खुसी देखिएका छन् । यस वर्ष मल पर्याप्त मात्रामा मौज्दात रहेकोले अभाव नहुने कृषि सामग्री कम्पनी लिमिटेड नेपालगन्जले दाबी गरेको छ ।
बाँकेमा अहिले ७० मेट्रिक टन युरिया, २५ मेट्रिक टन डिएपी र ६० मेट्रिक टन पोटास गरेर १२५ मेट्रिक टन मल मौज्दातमा रहेको कृषि सामग्री कम्पनी लिमिटेड नेपालगन्जका प्रमुख रमेश पौडेलले बताए ।
मल लिन आउने किसानले यस पटक मल नपाएको गुनासो हालसम्म नगरेको पौडेलले बताए । उनले गत आर्थिक वर्ष २०७९र०८० मा चार हजार १२५ मेट्रिक टन मल वितरण गरिएकोले पनि यस वर्ष अभाव नहुने बताए । उनले आर्थिक वर्ष २०७९र०८० मा एक सय ७ वटा सहकारीमार्फत् एक हजार ४५८ मेट्रिक टन डिएपी, दुई हजार ५५० मेट्रिक टन युरिया र ११७ टन पोटास वितरण गरिएको जानकारी दिए ।
प्रमुख पौडेलले अझै थप मल पनि आउने प्रक्रियामा रहेको र केही दिनमै आइसक्ने पनि जानकारी दिए । अघिल्लो वर्षको तुलनामा झण्डै २५ प्रतिशत बढी मल प्राप्त भएका कारण पनि मल अभाव नदेखिएको उनले बताए । वितरण प्रणालीलाई कम्पनीको तर्फबाट अनुगमन गरिँदै आएपनि मुख्यरुपमा अनुगमनको जिम्मेवारी स्थानीय तहलाई भएको उनले बताए ।
दुर्गममा रहेको नरैनापुर लगायत केही पालिकमा समस्या रहेको गुनासो आएकोले अनुगमन र ब्यवस्थापनमा ध्यान दिइएको कम्पनीले जनाएको छ । मल नपाएको वा दुरुपयोग भएका गुनासा पालिकामार्फत् वा स्वयम् प्रमाणसहित आएमा आवश्यक कारबाही गरिने पौडेलले प्रतिबद्धता जनाए । प्रमाण भेटिएको अवस्थामा डिलर खारेज गर्नेसम्मको कारबाही गरिने पनि उनले बताए ।
जिल्लामा मलको समानरुपमा वितरण गर्ने उदेश्यले फरक फरक स्थाननमा मलको भण्डारण गरिएको छ । गत वर्षभन्दा यस वर्ष बाँकेमा रासायनिक मल सहज रुपमा उपलब्ध भएपनि वितरणको जिम्मा लिएका केही सहकारीहरुले कृतिम अभाव बनाउन खोजेको बाँकेका किसानहरुको गुनासो छ ।
मल वितरणमा दुरुपयोग रोक्न वितरणको जिम्मा पाएको सहकारी र स्थानीय तहले नियमनलाई कडाइका साथ लागु गर्नुपर्ने कृषि सामग्री कम्पनीका प्रमुख पौडेलले बताए । सूचिकरणमा परेका सहकारी संस्थालाई साल्ट टे«डिङ र कृषि सामग्री कम्पनी लिमिटेडमार्फत मल उपलब्ध गराइने गरिएको छ ।
प्रतिक्रिया