नेपालगन्ज । नेपालबाट भारत भित्राइंदै गरेको ठुलो परिमाणको मदिरा सहित भारतीय प्रहरीले एकजनालाई नियन्त्रणमा लिएको छ । ऊत्तर प्रदेश जिल्ला बहराईच रुपैडिहा थानाले नेपाल–भारत सीमा नजिकैबाट ठुलो परिमाणको नेपाली मदिरा सहित एकजनालाई पक्राउ गरेको हो ।
पक्राउ पर्नेमा रुपैडिहा थानाको जिगरिया रामपुर मुन्ना पाठक गाउँका रामकुमार भन्ने लिलाउ सोनकर रहेको रुपैडिया थानाले जनाएको छ । रुपैडिया थानाका अनुसार पक्राउ परेका सोनकरको साथबाट नेपालका डिस्टिलरीमा बनाइने कच्ची तथा विदेशी मदिरा ठूलो परिमाणमा बरामद भएको छ ।
रुपैडिहा थानाका इन्स्पेक्टर कृष्णकुमार सिंहको कमाण्डमा खटीएको प्रहरी जवान अशोक प्रजापति, लक्ष्मण गौड, भीष्म यादवसहित मोबाईल टोली गस्तीले मदिरा सहित सोनकरलाई नियन्त्रणमा लिएको हो ।
भगवानपुर करिङ्गा वन चौकी नजिकैबाट जाँदै गरेका सोनकरलाई चेकजाँचका क्रममा बोराभित्र ४० लिटर कच्चा मदिार र नेपाली ब्राण्डको कर्णाली सौफी रक्शी बरामद भएको बताइएको छ । पक्राउ परेका सोनकरलाई भारतीय अन्तःशुल्क ऐन अन्तर्गत कारागार चलान गरिएको एसएचओ शमशेरबहादुर सिंहले जनाएका छन् ।
फोटो सौजन्य : लिमरा खबर
प्रतिक्रिया