काठमाडौं। कोशी प्रदेशको मुख्यमन्त्रीमा केदार कार्की नियुक्त भएका छन ।
सत्तारुढ गठबन्धनवाट नेकपा माओवादी केन्द्रका इन्द्रबहादुर आङबो र नेकपा एमालेको समर्थनमा नेपाली कांग्रेसको बिद्रोही पक्षधर केदार कार्की मध्ये कसलाई मुख्य मन्त्री नियुक्त गर्ने भन्नेमा बारेमा विवाद कायम रहेको बेला कार्की मुख्यमन्त्री नियुक्त भएका हुन् ।
हिजो साँझ ५ बजेसम्म दुईजनाको दावेदारी प्रस्तुत भए पछि प्रदेश प्रमुख परशुराम खापुङले आज दुवै पक्षका सांसदहरुको सनाखत गराउन बोलाएका थिए । जसअनुसार बिहान ८ बजे देखी सुरु भएको सनाखतमा कार्कीले बहुमत पुरयाए पछि कोशीमा कांग्रेसका बिद्रोही कार्की मुख्यमन्त्रीमा नियुक्त भएका हुन । प्रदेश प्रुमख खापुङले उनले नियुक्त गरिएको जानकारी दिए ।
माओवादी नेता आङ्बोले गठबन्धनमा रहेका दलहरु मध्ये नेपाली कांग्रेसका २९, माओवादीका १३, नेकपा एसका ३ र जसपाका १ सांसदको हस्ताक्षर बुझाएका थिए भने कांग्रेसका बिद्रोही उम्मेदवार कार्कीले आफूसहित कांग्रेसका ९ तथा एमालेका ३९ सदस्यको हस्ताक्षरसहित कुल ४८ जनाको समर्थनसहित मुख्यमन्त्रीको दाबी गरेका थिए ।
आङबोले बुझाएको हस्ताक्षरमा आफनो नाम उल्लेख गरेको भन्दै कार्की समुहले आपत्ति जनाएको थियो । आङबोले बुझाएको पत्रमा राखिएको आफनो समुहका सांसदहरुको हस्ताक्षर नक्कली भएको दाबी गर्दै कार्की समुहले प्रतिवाद गरेको थियो । जसअनुसार आङबो समुह हस्ताक्षर सनाखतमा जान नसके पछि आज कार्कीलाई मुख्यमन्त्रीमा नियुक्त गरिएको हो ।
कांग्रेसभित्र पार्टी सभापति शेरबहादुर देउवामाथि शेखर कोइरालाले आफु निकट कार्कीलाई विद्रोह गर्न निर्देशन दिएका थिए । संविधानको धारा १६८ को उपधारा ५ अनुसार सरकार बनाउँदा पार्टीको ह्वीप नलाग्ने भएपछि कोइरालाले कार्कीलाई विद्रोह गराएर देउवामाथि तरबार चलाए ।
कांग्रेसभित्रको किचलोलाई नजिकबाट नियालिरहेको एमालेले मौकाको फाइदा उठायो । आफु विरुद्ध आफ्नै पार्टीका सांसद प्रयोग गरेर प्रधानमन्त्री बनेपछि देउवा विरुद्ध एमाले अध्यक्ष केपी ओलीले प्रतिरोध गर्ने दाउ खोजिरहेका थिए । कांग्रेसभित्र विभाजनको अवस्था ल्याउने गरी कोशीबाट सुरु गरेको यो प्रतिरोधको अस्त्र अब केन्द्रमा पनि पर्ने विश्वास एमालेले लिएको छ ।
प्रतिक्रिया