बुटवल आउँदै गरेको मोटरसाइकल पाल्पामा दुर्घटना, एकजनाको मृत्यु

बुटवल । सिद्धार्थ राजमार्ग अन्तरर्गत पाल्पाको विरौटामा मोटरसाइकल दुर्घटना हुँदा एकजनाको मृत्यु भएको छ । दशैं मनाएर स्याङ्जादेखि बुटवलतर्फ आउँदै गर्दा मोटरसाइकल दुर्घटनामा परी स्याङ्जा वालिङ नगरपालिका–५ का ४१ वर्षीय मोहनीलाल थापाको मृत्यु भएको हो ।

थापा सवार लु १४ प ८८७१ नम्बरको मोटरसाइकलमा पाल्पाको माथागढी–१ बिरौटामा शनिबार दिउँसो दुर्घटनामा परेको प्रहरीले जनाएको छ । जिल्ला प्रहरी कार्यालय पाल्पाका अनुसार दुर्घटनामा परी घाइते भएका उनलाई थप उपचारका लागि जिल्ला अस्पताल पाल्पा पठाइएकोमा डाक्टरले मृत घोषणा गरेका थिए ।

घटना बारे थप अनुसन्धान जारी रहेको जिल्ला प्रहरी कार्यालयका प्रहरी नायव उपरीक्षक सुगन्ध श्रेष्ठले जानकारी दिएका छन् ।