मोटरसाइल चोरीको २२ उजुरीमा ७ जना चोर सहित ७ मोटरसाइल फेला

नेपालगन्ज । बाँके प्रहरीमा २२ वटा मोटरसाइकल चोरी भएकोे उजुरी परेकोमा ७ वटा मोटरसाइकल र ७ जना मोटरसाइकल चोर्ने व्यक्ति प्रहरीले फेला पारेको छ ।

प्रहरीको पछिल्लो सफलतामा चोरी भएको डुडुवा गाउँपालिकाका लेखा अधिकृतले चढ्ने मोटरसाइकल प्रहरीले चोर सहित फेला पारेको छ । भे १ व १७९६ नम्बरको मोटरसाइकल नेपालगञ्जको कारकादोबाट चोरी भएको थियो । प्रहरीले कारकादोबाटै भारत बहराइच थाना रुपैडिहा नानपारा बस्ने २० वर्षको अमन श्रीवास्तवलाई चोरीको मोटरसाइकलसहित पक्राउ गरेको छ ।

गत १४ गतेपनि प्रहरीले २ जना चोर सहित एक मोटरसाइकल स्वरुप परिवर्तन गरेको अवस्थामा फेला परेको थियो । मोटरसाईकल चोरीको आरोपमा १४ गते पक्राउ पर्नेमा नेपालगन्ज उपमहानगरपालिका वडा नम्बर ८ का अजयसिंह बाडिया र वडा नम्बर ९ का रमेश भन्ने हरि सुनार रहेका थिए ।

पक्राउ परेकाहरुबाट प्रहरीले नेपालगन्ज उपमहानगरपालिका वडा नम्बर ८ का अतहर हुसेन फारुकीको दुई दिन अघि चोरी भएको मोटरसाइकललाई रंग परिवर्तन गरेको अवस्थामा बरामद गरेको थियो । उनीहरुलाई प्रहरीले कारकादोको जनता ग्यारेज अगाडिबाट पक्राउ गरेको थियो ।

पछिल्लो दुई महिनायता नेपालगञ्जमा २२ वटा मोटरसाइकल चोरी भएको प्रहरीमा निवेदन परेको छ । त्यसमध्येमा सात जना चोर र सात वटा मोटरसाइकल प्रहरीले फेला पारेको जिल्ला प्रहरी कार्यालय, बाँकेका प्रवक्ता डीएसपी नारायण डाँगीले जानकारी दिए ।