नेपालगन्ज । स्वास्थ्य कार्यालय, बाँकेले जिल्लाका पालिकाहरुमा सञ्चालन गरेको स्थायी बन्ध्याकरण शिविरमा १ सय २५जनाको स्थायी बन्ध्याकरण हुँदा बन्ध्याकरण गर्नेको पुरुषको संख्या जम्मा १३ जना रहेका छन् । मंसिर १४ गतेदेखि सञ्चालन गरिएको शिविरमा एक सय पच्चीस जनाले बन्ध्याकरण गर्दा १३ जना पुरुषले मात्र स्थायी बन्ध्याकरण गरेका हुन् ।
जानकी गाउँपालिकामा र डुडुवामा त पुरुषहरु बन्ध्याकरण गर्न आउँदै नआएको स्वास्थ्य कार्यालय बाँकेले जनाएको छ् । जानकीमा १५ जना महिला र डुडुवा गाउँपालिकामा ७ जना महिलाले बन्ध्याकरण गरेका छन् ।
खजुरा गाउँपालिकामा १९ जनाले बन्ध्याकरण गर्दा १८ जना महिला र एक जना पुरुषले बन्ध्याकरण गरेका थिए । बैजनाथ गाउँपालिकामा सात जनाको बन्ध्याकरण गर्दा ५ जना महिला र दुई जना पुरुष रहेका छन् । कोहलपुर नगरपालिकामा २० जनाको बन्ध्याकरण गरिएको थियो । त्यसमा १८ महिला र दुई पुरुष थिए । नरैनापुर गाउँपालिकाको गंगापुरमा ११ जनाको अप्रेसन गरिएकोमा ८ महिला र तीन पुरुष थिए । राप्तीसोनारी गाउँपालिकाको कमैयाडाडामा १६ जनाको बन्ध्याकरण गर्दा १५ महिला र एक पुरुष तथा बैजापुर अस्पतालमा गरिएको शिविरमा १५ जनाले बन्ध्याकरण गरेकोमा १४ जना महिला थिए ।
नेपालगन्ज उपमहानगरपालिकाको नेपाल परिवार नियोजन संघ भवनमा राखिएको शिविरमा महिला १३ जनाले मिनिल्याप गराउँदा पुरुष २ जनाले मात्र भ्याक्सेटोमी गराएका छन् ।
निशुल्क गरिएको शिविरमा मिनिल्याप (महिलाको अप्रेसन) गर्नेको संख्या बढी देखिएको स्वास्थ्य कार्यालय, बाँकेका फोकलपर्सन देवनारायण उपाध्यायले जानकारी दिए । पुरुषले बाहिर गएर काम गर्नुपर्ने भएको र अप्रेसन गर्दा कमजोर हुन्छ भन्ने भ्रमित मानसिकता देखिएकाले महिलाको बढी बन्ध्याकरण भएको उनले बताए ।
प्रतिक्रिया