नेपालगन्ज । अबैध रिक्सा संचालन गरिरहेका रिक्सा धनीहरुको पक्षमा नेपालगन्जमा प्रदर्शन गरिएको छ । बिना अनुमति कागजपत्र बिहिन अबैध रिक्सा नियनत्रणमा नेपालगन्ज उपमहानगरले कडाई गर्न थालेपछि अबैध रिक्सा धनीहरुको पक्षमा नेपालगन्जमा प्रदर्शन भएको हो ।
कुनै कानुनी प्रक्रिया पुरा नगरि बिना अनुमति र कागजपत्र नै नभएका इ-रिक्सा नगरमा गुड्न थालेपछि उपमहानगरले नियन्त्रणमा लिएर नष्ट गर्न थालेको थियो । नेपालगन्ज उपमहानगरपालिकाले इ-रिक्सा माथी डोजर चलाएर नष्ट गरेको बिरोधमा ई-रिक्सा ब्यवसायीले नेपालगन्ज उपमहानगरपालिका कार्यालय अगाडी गरेका हुन् । इ-रिक्सा माथी डोजर चलाएर गरिबको गाँस खोसेको भन्दै इ-रिक्सा ब्यवसायी संघ बाँकेको अगुवाईमा इ-रिक्सा ब्यवसायी आन्दोलनमा उत्रिएका छन ।
गैरकानुनी रुपमा बिना कागजपत्र बिना दर्ता आफूखुसी सडकमा गुडिरहेको इ-रिक्सालाई लामो समयदेखि नियन्त्रणमा लिएर ताकेता गर्दा पनि कागजपत्र नबुझाएपछि ‘अबैध’ भनी इ-रिक्सालाई उपमहानगरपालिका कार्यालयले मंगलबार डोजर चलाएर नष्ट गर्न थालेको थियो ।
इ-रिक्सा नष्ट गरेको विरोधमा ठुलो संख्यामा इ-रिक्साहरु सडकमा तेर्साएर व्यवसायीले कार्यालयको मुलगेटमा बाँकेका प्रमुख जिल्ला अधिकारी र नगर प्रमुखका विरुद्ध चर्का नाराबाजी गरेका छन् ।
आन्दोलनको नेतृत्व गरेको इ-रिक्सा ब्यवसायी संघ बाँकेका अध्यक्ष कुमारसिंह ठकुरीले आफ्ना माग पुरा नहुँदासम्म आन्दोलन नरोक्ने बताएका छन् ।उनले गरिबको इ-रिक्सा डोजर चलाउन नमिल्ने बताउँदै कागजपत्र देखाउन नसकेकै भरमा रिक्सा नष्ट गर्नु गलत भएको बताए । ‘कहिलेकाहीँ कागज हराउँछ, कागज हराउँदैमा रिक्सामाथी डोजर चलाइदिने ?’ उनले प्रस्न गरे ।
संघले उपमहानगरपालिकादद्वारा नष्ट गरेका इ-रिक्साको क्षतिपुर्ति दिनुपर्ने, नियन्त्रणमा लिइएका इ-रिक्साहरुलाई एक पटकलई फिर्ता गर्नुपर्ने, उपमहानगरपालिकामा दर्ता भएका इ-रिक्साहरुलाई नविकरण गरिदिनुपर्ने र उपमहानगरपालिकाले पारित गरेको ‘इ-रिक्सा व्यवस्थापन गर्ने सम्बन्धी कार्यविधि-२०७८’ पूर्ण रुपमा लागु गर्नुपर्ने माग राखेको छ ।
नेपालगन्जमा लामो समयदेखि बिना दर्ता, बिना कागजपत्र र बिना बिल भरपाईको इ-रिक्सा चल्दै आएपछि नगरको ट्राफिक ब्यवस्थापनमा गम्भीर असर पर्दै आएको थियो । इ-रिक्सा नियन्त्रण गर्न नसकेको भन्दै स्थानीयले उपमहानगरपालिका नेतृत्वको आलोचना गरेपछि उपमहानगर प्मुख प्रशान्त विष्टले इ-रिक्सा नियन्त्रणको प्रयास थालेका थिए ।
उपमहानगरले दर्जनौ पटक प्रमाण सहित इ-रिक्साको कानुनी हैसियत पुरा गर्न इ-रिक्सा ब्यवसायीलाई सूचना गरेपनि उपमहानगरको सूचनाको बेवास्ता गर्दै नेपालगन्जमा इ(रिक्सा आतंक चलिरहेको थियो । अनियन्त्रित इ-रिक्साकै कारण नेपालगन्जको सुर्खेतरोडमा हरेकदिन दुर्घटना बढेको स्थानीयबासीको गुनासो छ ।
इ-रिक्सा व्यवसायीको आन्दोलनलाई मध्यनजर गर्दै उपमहानगरपालिकाको मुलगेटमा ठूलो संख्यामा नगर प्रहरी तथा नेपाल प्रहरी परिचालन गरिएको छ ।
प्रतिक्रिया