नेपालगन्ज । नेपालगन्जमा पहिलो पटक क्याफेमा बसेर किताव पढ्न पाइने भएको छ । सदभावको शहरकारुपमा रहेको नेपालगन्जमा पहिलो बुक क्याफेकारुपमा कुटुम्ब क्याफे संचालनमा आएसँगै पुस्तकका पारखीहरुले चिया कफिको चुस्कीसँगै पुस्तकको आनन्द लिन पाउने भएका हुन् ।
पुस्तक व्यवसायी बासु भण्डारीले बुधबार देखि नेपालगन्जमा कुटुम्ब बुक क्याफे संचालनमा ल्याउन थालेका हुन् । लामो समयदेखि स्टेसनरी तथा खेलकुद सामाग्रीको कारोबार गर्दै आएका भण्डारीले अध्ययनशिल बौद्धिक वर्गलाई लक्षित गर्दै बुक क्याफे संचालनमा ल्याउन थालेको बताए ।
नेपालका अन्य शहरहरुमा बुक क्याफेहरु संचालनमा रहेपनि नेपालगन्जमा बुक क्याफेको आवश्यकता महसुस गरिँदै आएको थियो । नेपालगन्जमा संचालनमा रहेका केही क्याफेहरुले अनौपचारिक पत्रपत्रिका र केही कितावहरु राख्न गरेपनि पुस्तकको उपलब्धता सहित खुल्ने कुटुम्ब बुक क्याफे पहिलो भएको संचालक भण्डारीले दाबी गरे । नेपालगन्जको धम्बोझीमा खोल्न थालिएको कुटुम्ब बुक क्याफेको बुधबारबाट सेवा आरम्भ हुने उनले बताए । उनले क्याफेमा नयाँ प्रकाशित पुस्तक तथा दुर्लभ ऐतिहासिक पुस्तकहरु पढ्ने ब्यवस्था मिलाइएको बताए ।
प्रतिक्रिया