नेपालगन्ज । नेपालगन्जमा पहिलो पटक क्याफेमा बसेर किताव पढ्न पाइने सुबिधा सहितको बुक क्याफे संचालनमा आएको छ । नयाँ मुलुकको ऐतिहासिक शहरकारुपमा रहेको नेपालगन्जमा पहिलो बुक क्याफेकारुपमा कुटुम्ब क्याफे संचालनमा आएसँगै पुस्तकका पारखीहरुले चिया कफिको चुस्कीसँगै पुस्तकको आनन्द लिन पाउने भएका छन् ।
पुस्तक व्यवसायी बासु भण्डारीले २५ लाखको लगानीमा बुधबार देखि नेपालगन्जमा कुटुम्ब बुक क्याफे संचालनमा ल्याएका छन् । लामो समयदेखि स्टेसनरी तथा खेलकुद सामाग्रीको कारोबार गर्दै आएका भण्डारीले अध्ययनशिल, बौद्धिक तथा बिद्यार्थीहरुलाई लक्षित गर्दै बुक क्याफे संचालनमा ल्याएको बताए ।
नेपालगन्जमा बिभिन्न स्वादका क्याफे र बेकरीहरु रहेपनि लामो समयदेखि बुक क्याफेको आवश्यकता महसुस गरिँदै आएको थियो । नयाँ खुलेको बुक क्याफेले अध्ययनमा अभिरुची राख्नेहरुका लागि सहज बनाइदिएको क्याफेमा भेटिएका बरिष्ठ पत्रकार झलक गैरेले बताए ।
केही सिक्न चाहने र जान्न चाहनेहरुका लागि कुटुम्ब क्याफे अध्ययनको केन्द्र बन्न सक्ने खेल पत्रकार टिएस ठकुरीले बताए ।
आज मध्यान्ह देखि संचालनमा आएको क्याफेमा आज दिनभरी नेपालगन्जका कफी र पुस्तकका पारखीहरुको भीड लागेको छ ।
नेपालगन्जमा संचालनमा रहेका केही क्याफेहरुले अनौपचारिक पत्रपत्रिका र केही कितावहरु राख्न गरेपनि पुस्तकको उपलब्धता सहित खुल्ने कुटुम्ब बुक क्याफे पहिलो भएको संचालक भण्डारीले दाबी गरे ।
नेपालगन्जको धम्बोझीमा खुलेको क्याफेलाई दुईभागमा बिभाजन गरिएको छ । क्याफेमा प्रवेश गरेसँगै पुस्तक सहित परिकारको सेवा लिन सकिने छ भने त्यसपछिको भागमा अत्याधुनिक रेष्टुरेन्ट संचालन गरिएको छ । सालिन र पारीवारिक ब्यक्तित्वहरु नै क्याफेको लक्षित ग्राहक हुने अपेक्षा छ । संचालक भण्डारीले भने ।
बुक क्याफेमा कम्तीमा ४ जना र रेष्टुरेन्टमा १५ बढीले रोजगारी पाउने र रेष्टुरेन्टमा मात्र ७० लाख बढीको लगानी रहेको भण्डारीले बताए । रुफटप, फेमिली क्याबिन र मिटिङ हल सहित रहेको कुटुम्बको रेष्टुरेन्टमा नेपाली रैथाने परिकार उपलब्ध हुने उनले बताए ।
भण्डारीका अनुसार बुक क्याफे परिसरमा धुम्रपान, मध्यपान र सुर्तीजन्य पदार्थ सेवन गर्न निषेध गरिएको छ भने रेष्टुरेन्टमा छुट्टै धुम्रपान क्षेत्र तोकेर अन्य स्थानलाई पारिवारीक वातावरण बनाइएको छ ।
उनले क्याफेमा नयाँ प्रकाशित पुस्तक तथा दुर्लभ ऐतिहासिक पुस्तकहरु पढ्ने ब्यवस्था मिलाइएको बताए ।
प्रतिक्रिया