काठमाडौं । प्रधानमन्त्री पुष्पकमल दाहाल प्रचण्डले कांग्रेस सभापति शेरबहादुर देउवा र एमाले अध्यक्ष केपी शर्मा ओलीसँग छुट्टाछुट्टै भेट गरेका छन् ।
संक्रमणकालीन न्यायलाई टुंगो लगाउने विषयमा प्रधानमन्त्री पुष्पकमल प्रचण्डले आज बिहान देउवा र ओलीसँग छुट्टाछुट्टै छलफल गरेका हुन्। प्रचण्डले एमाले अध्यक्ष ओलीसँग एक घण्टा लामो छलफल गरेपछि कांग्रेस सभापति देउवासँग झण्डै ४० मिनेट छलफल गरेका थिए ।
प्रधानमन्त्री निवास बालुवाटारमा भएको छलफलमा बेपत्ता पारिएका व्यक्तिको छानबिन, सत्य निरुपण तथा मेलमिलाप आयोगसम्बन्धी विधेयकका सन्दर्भमा प्रधानमन्त्रीले प्रमुख प्रतिपक्षी दल एमालेका अध्यक्ष ओली र सभापति देउवासँग छलफल गरेको प्रधानमन्त्रीका प्रेस विज्ञ मनोहरि तिमिल्सिनाले जानकारी दिएका छन् ।
छलफलमा संक्रमणकालीन न्यायसँग सम्बन्धित द्वन्द्व पीडितलाई न्याय तथा परिपुरण गर्ने र पीडकलाई कारबाही गर्ने सवालमा टुंगो लाग्न बाँकी रहेको विषयमा साझा सहमति खोजिएको थियो ।
संक्रमणकालीन न्याय (टीआरसी)सम्बन्धी विधेयक हाल प्रतिनिधिसभाको कानुन समितिमा छलफलका क्रममा छ । समितिको बैठक आजै बस्दैछ । सोही बैठकमा सहमति जुटाएर संसदको पूर्ण बैठकमा पेश गर्ने वातावरण बनाउन प्रधानमन्त्रीले दुई नेतासँग छलफल गरेका हुन् ।
टीआरसी विधेयकमा एमालेले चार मुख्य विषयमा आफ्नो असहमति रहेको जनाउँदे आएको छ । यद्यपी, एमालेले यो विधेयकलाई आफ्नो बार्गेनिङ प्वाइन्टको रुपमा राखेको भन्दै आलोचना पनि भैरहेको छ । किनकी, टीआरसी विधेयकमा सकेसम्म सबै दलहरुको साझा सहमति आवश्यक मानिएको छ । सहमति नै हुन नसक्ने अवस्थामा भने बहुमतबाट भएपनि टुंगो लगाउनुपर्नेमा सत्तारुढ माओवादी र कांग्रेसका नेताहरुको मत रहेको छ ।
प्रतिक्रिया