काठमाडौं । मन्त्रालयको भागबन्डा गर्न सोमबार बनेको नयाँ सत्ता गठबन्धनको बैठक बस्दैछ।
माओवादी, एमाले, रास्वपा र जसपासम्मिलित चार दलीय गठबन्धनको बैठक दिउँसो ३ बजे बोलाइएको छ । प्रधानमन्त्री निवास बालुवाटारमा बस्ने बैठकमा मन्त्रालयहरु बाँडफाँडमा सहमति खोजिने छ । गठबन्धनमा एकीकृत समाजवादी र लोसपालाई पनि सम्मिलित गराउन प्रयास भैरहेको जसपाका नेता राजेन्द्र श्रेष्ठले बताएका छन् ।
रास्वपाले भने गृहमन्त्रालयलाई आफ्नो बटमलाइन बनाएको छ । गृहसहित चार मन्त्रालय आफुले पाउनुपर्ने अडान सो पार्टीले लिएको छ । माओवादी र एमालेबीच गृहमन्त्रालय र अर्थमन्त्रालय दुई दलले बाँडफाँड गर्ने सहमति भएको बताइएको थियो । तर, रास्वपाले गृहमन्त्रालयमा सभापति रवि लामिछानेलाई नै पठाउने गरी आफ्नो अडान राखेको हो । यही अडान गठबन्धनको बैठकमा पनि राखिने रास्वपाका नेता स्वर्णिम वाग्लेले बताएका छन् ।
नयाँ गठबन्धनबीच सोमबार साँझ आठ बुँदे सहमति भएको थियो । सो सहमतिअनुसार राष्ट्रियसभाको अध्यक्ष माओवादी र उपाध्यक्ष एमालेले पाउनेछन् । यस्तै मन्त्रालय बाँडफाँडलाई पनि सहमतिमै टुंग्याइने सहमति गरिएको छ ।
प्रतिक्रिया