डढेलो निभाउने प्रयास गर्दा गुल्मीमा एकजनाको ज्यान गयो, एकजना घाइते

गुल्मी । गुल्मीमा डढेलो नियन्त्रणका क्रममा घाईते भएका मध्य एक पुरुषको मृत्यु भएको छ । जिल्लाको मुसिकोट नगरपालिका(१ तल्लो पौदिस्थित सल्लाघारिमा लागेको डढेलो निभाउने क्रममा आज (सोमबार) विहान साढे ११ बजेतिर दुई जना घाईते भएका थिए ।

घाइते मध्ये स्थानीय ५८ वर्षीय महले घर्तिको मृत्यु भएको हो । उनको गुल्मी अस्पतालमा उपचारक्रममा दिउँसो करिब ३ बजे चिकित्सकले मृत घोषणा गरेको गुल्मी प्रहरीले जनाएको छ ।

पौदि स्थित सर्बोदय माविको जग्गाको सल्लाघारिमा डढेलो निभाउने क्रममा मृतक घर्तीसहित ५२ वर्षीय स्थानीय रेशम थापा चिप्लिएर करिव १५० मिटर तल खस्दा गम्भीर घाईते भएका थिए । थापाको गुल्मी अस्पतालमा उपचार भईरहेको छ । उनको स्वास्थ्य अवस्था सामान्य बन्दै गएको अस्पतालले जनाएको छ ।