नेपालगन्ज–गुलरिया सडकको ६५ प्रतिशत काम पूरा

नेपालगन्ज । हुलाकी सडक आयोजनाअन्तर्गत निर्माणाधीन नेपालन्ज–गुलरिया सडक खण्डको ६५ प्रतिशत कार्य सम्पन्न भएको छ । नेपालन्जको नन्दनी मिलदेखि खजुरासम्म कालोपत्रेको पहिलो लियर्सको काम सम्पन्न भएको छ भने धनौली देखि मैनापोखरा सम्मको एक तर्फी पहिलो लियर्सको कालोपत्रे सकिएको छ ।

नेपालन्जस्थित हुलाकी राजमार्ग निर्देशनालय कार्यालयका सूचना अधिकारी इञ्जिनियर कृष्ण पाण्डेका अनुसार एघार दशमलव ६ किलोमिटर चार लेन र सोह्र दशमलव दुई किलोमिटर दुई लेन गरी सत्ताइस दशमलव ६२ किलोमिटर सडक विस्तार २०८२ मङ्सिर २७ गतेभित्रमा सम्पन्न गर्ने गरी २०७९ माघ १५ गतेदेखि निर्माण थालिएको हो ।

शर्मा एण्ड कम्पनीले मूल्य अभिवृद्धि कर (भ्याट) बाहेक रु दुई अर्ब ७८ करोड २९ लाख निर्माणको ठेक्का जिम्मा पाएको हो । नन्दनी मिलदेखि सुरु भएको कालोपत्रको काम जानकी गाउँपालिका हुँदै खजुरा गाउँपालिका क्षेत्रमा धमाधम जारी छ । नन्दनी मलि देखि धम्बोझी चोक सम्मको सडकको साईड क्लीयर गर्ने क्रम सुरु भएको र साईड क्लीयर भएलगत्तै काम सुरु हुने ठेकेदार कम्पनीले जनाएको छ ।