नेपालगन्ज । राष्ट्रिय गौरवको हुलाकी सडक आयोजना अन्तर्गत नेपालगन्ज–गुलरिया सडक खण्डमा नेपालगन्ज तर्फबाट कालोपत्रेको काम शुरु भएको छ । हलाकी सडकको नेपालगन्जको प्रस्थान बिन्दु नन्दनी मिलदेखि एकतर्फी सडक कालोपत्रेको काम शुरु भएको हो ।
निर्माण कम्पनी शर्मा एण्ड कम्पनीका प्रबन्ध निर्देशक रमेश शर्माले सरकारले समयमै बजेट व्यवस्थापन गरे ठेक्का अवधि सकिनु १ वर्ष पहिले नै काम सक्ने बताएर फर्के लगत्तै कालोपत्रेको काम सुरु भएको हो । निवर्तमान भौतिक पूर्वाधार तथा यातायात मन्त्री प्रकाश ज्वालासँगै सो सडकको अनुगमन गर्न आएका बेला प्रबन्ध निर्देशक शर्माले यसै वर्षमा कम्तीमा २० किलोमिटर सडक कालोपत्रे गर्ने काम सम्पन्न गर्ने बताएका थिए ।
११.६ किलोमिटर चारलेन र १६.०२ किलोमिटर दुई लेन गरी २७.६२ किलोमिटर लामो सडक विस्तार कार्य २०८२ मङ्सिर २७ गते तीन वर्षमा सम्पन्न हुने गरी शर्म एण्ड कम्पनीले गत वर्ष माघ १५ गतेदेखि निर्माण कार्य शुरु गरेको थियो । एक वर्षको अवधिमा करिब ६० प्रतिशत काम सम्पन्न भइसकेको कम्पनीको दाबी छ ।
ठेकेदार कम्पनीले धमाधम काम अगाडि बढाएपनि हुलाकी सडक निर्देशनालयले भने कार्य सम्पन्न भएको मध्य ४४ करोड रुपैयाँ भुक्तानी दिन बाँकी रहेको कार्यालयले जनाएको छ । करोडौंको काम सम्पन्न गरिसक्दा पनि भुक्तानी नपाएपछि काम रोक्ने मुडमा पुगेको कम्पनीलाई निवर्तमान मन्त्री ज्वाला सहित निर्देशनालयका उच्च अधिकारीहरुले भुक्तानी गर्ने आश्वासन दिएपछि काम सुचारु गरिएको ठेकेदार कम्पनीले जनाएको छ
शर्मा एण्ड कम्पनीले मूल्य अभिवृद्धि कर बाहेक दुई अर्ब ७८ करोड २९ लाख रुपैयाँमा निर्माणको जिम्मा पाएको थियो । मन्त्रालयको जम्बो टोली सहित आएको निवर्तमान मन्त्री कै अगाडी कम्पनीका प्रबन्ध निर्देशक शर्माले नेपालगन्ज गुलरिया सडकको निर्माण सम्पन्न गरेर गुणस्तरियता र समय सिमाका विषयमा बुटवल-नारायणगढ सडक निर्माण गरिरहेको चिनियाँ ठेकेदारलाई नमुना देखाउन चाहेको बताएका थिए ।
सोही सडक अन्तर्गत खजुरा बजार खण्डको १८ सय मिटर सडक भने अर्का ठेकेदार कम्पनी गजुमुखी निर्माण प्रालीले कन्तबिजोग बनाएर छाडेको छ । गुणस्तरहिन सडक बनाएको गजुरमुखीले निर्माण सम्पन्न नहुँदै दर्जनौ स्थानमा तालतुल पार्दै काम गरेको दाबी गरेको छ ।
प्रतिक्रिया