भैरहवा । रुपन्देहीको सिद्धार्थनगर नगरपालिका-६ का दाजुभाइ लालजित मल्लाह र सन्त मल्लाहको जग्गा हडप्न खोजेको पाइएको छ । निःसन्तान सुखु मल्लाहको मृत्युपछि अदालतको फैसलाबाट उनको सम्पत्ति दाइ फौदार मल्लाहका लालजित र सन्त मल्लाहको नाममा गएको थियो । आफूहरुलाई छोरीहरु दावी गर्ने मालती मल्लाहीन र रिखीदेवी मल्लाहले आफूहरुको सम्पत्ति हडप्ने खोजेको लालजित र सन्तको आरोप छ ।
लालजित र सन्त मल्लाहका बुवाहरु दुइभाइ हुन् । लालजित र सन्तका बुवा फौदार हुन् भने काका सुखु मल्लाह । काका सुख’ र काकी कपुतरीका कोखबाट सन्तान नभएपछि उनीहरुका बुवा फौदारको २०७७ जेठ ८ र आमा झिनाको भने १० वर्ष अघि नै मृत्यु भइसकेको छ । काका सुखुको २०७८ असार १७ र काकी कपुतरी मल्लाहको २०७७ माघ १० मृत्यु भयो । सन्तान नभएकाले सुख र कपुतरीको सहारा लालजित र सन्त बनेका थिए । ‘दुखबिरामी हुँदा, औषधी उपचारदेखि मृत्युपछिका सम्पूर्ण संस्कार हामी दुइभाइले गरेका हौं’, बिहीबार भैरहवामा पत्रकार सम्मेलन गर्दै सन्तले भने, बुवाआमा र काकाकाकी बाचुञ्जेल कसैको दावी थिएन । तर मृत्युपछि एकाएक मालती र रिखीदेवी छोरी बनेर सम्पत्ति खान लागे ।’
बुवाआमा र काकाकाकीको मृत्युपछि लालजित र सन्तले निसन्तान भएको भन्दै काकाको नाममा रहेको जायजेथा आफूहरुका नाममा लिनका लागि रुपन्देही जिल्ला अदालतमा मुद्दा दर्ता गरे। अदालतले २०७८ कार्तिक १५ गते फौदार र सुखुको नाममा रहेको जमिन लालजित र सन्तको नाममा जाने फैसला गन्यो ।
अंशवण्डा गरेर उनीहरुले सबै जायजेथा दुइभाइका नाममा गराए । ‘त्यसपछि एकाएक २०७८ फागुन १० गते हाम्रो घरमा अंश मुद्दा परेको भन्दै जिल्ला अदालत, रुपन्देहीले म्याद पठायो । म्याद बुझेर हामी अदालत गयौं । यसपछि बल्ल थाहा भयो, काका सुखुको छोरी बनेर अंशका लागि सिद्धार्थनगरकी रिखीदेवी मल्लाह अग्रवाल र मायादेवी गाउँपालिका-३ की मालती मल्लाहले मुद्दा हालेका हुन्,’सन्तले भने, ‘जबकि काका सुखुको सन्ताने जन्मिएका थिएनन् । एकाएक अर्कै दुई महिलाले अदालतमा अंश मुद्दा दायर गरे पछि हामी अन्यायमा पन्यौ र अदालत र प्रशासन धाउन थाल्यो।’ अंश मुद्दा हाल्ने रिखीदेवी र मालतीले सुखुको दुई श्रीमती रहेको दावी गरेका थिए । रिखीदेवीले सुखुको पहिलो श्रीमती कपुतरी र मालतीले दोस्रो श्रीमती फूलभरी मल्लाहको छोरी भएको दावी गरेका थिए । अदालतमा मुद्दा परेपछि लालजित र सन्तले जिल्ला प्रशासनमा मालती र रिखीदेवीको नागरिकता खारेजी मुद्दा दिएका थिए । तर, प्रशासनले जाँचबुझ नगरेको लालजितको आरोप छ ।
‘पहिला पनि सर्जमिन भएको रहेछ, पीडितहरुले पुनः तामेली जगाउन भन्दै निवेदन दिनुभयो, यसबारे हामीले बुझ्यौं र दर्ता गर्यौं’, रुपन्देहीका प्रमुख जिल्ला अधिकारी गणेश अर्यालले भने, ‘त्यसपछि पुनः प्रहरी मार्फत् वडा कार्यालयमा गएर सम्बन्धित ठाउँमा सर्जमिन गरेर आएको छ । अहिले अनुसन्धान हुँदैछ ।’ उनका अनुसार केही तथ्यहरु र कागजात फेला परेपछि रिखीदेवी र मालतीको नागरिकताबारे अनुसन्धान हुदैछ ।
प्रतिक्रिया