काठमाडौं । ३३ वर्ष पुरानो मुद्दामा दोषी ठहरिएका लुम्बिनी प्रदेशसभा सदस्य धनबहादुर केसी कारागार चलान भएका छन् ।
३३ वर्ष पुरानो कीर्ते मुद्दामा दोषी ठहरिएका सांसद केसीले आइतबार रुकुम पूर्व जिल्ला अदालत पुगेर आत्मसर्मण गरे लगत्तै उनलाई कारागार चलान गरिएको रुकुम पूर्वका डीएसपी माधव खरेलले जानकारी दिए ।
धनबहादुरलाई श्रीमतीसँगको अंश मुद्दामा प्रदेश सांसद केसीले कीर्ते गरेको अभियोगमा साबिक रुकुम जिल्ला अदालतले ३३ वर्ष पहिले दोषी ठहर गर्दै एक वर्ष कैद र दुई हजार जरिवानाको फैसला सुनाएको थियो।
अदालतले एक वर्ष कैद र दुई हजार जरिवानाको फैसला सुनाए पनि केसीले सजाय भुक्तान नगरि बसेका थिए । लामो समयदेखि प्रहरीको फरार सूचीमा रहेका उनी कांग्रेसको उच्च नेताहरुको संरक्षणमा खुल्ला राजनीतिमा सक्रिय थिए ।
उनी गत निर्वाचनमा नेपाली कांग्रेसको तर्फबाट रुकुम पूर्वको प्रदेशसभा क्षेत्र नं १ बाट निर्वाचित भएका थिए भने गत महिनामा मुख्यमन्त्री चेतनारायण आचार्यलाई विश्वासको मत दिन समेत प्रदेशसभामा उपस्थित भएका थिए । प्रहरीको फरार सूचीमा रहेका सांसद केसीलाई गत वर्ष बुटवलमा जारी नेपाली कांग्रेस लुम्बिनी प्रदेशको प्रथम सम्मेलनबाट सम्मानित समेत गरिएको थियो । पार्टी सङ्गठन सुदृढीकरणमा महत्पूर्ण भूमिका खेलको भन्दै नेपाली कांग्रेसले उनलाई सम्मान गरेको थियो ।
प्रतिक्रिया