लोकतन्त्रको अपहरण गर्न ओली सरकार बनेको हो : नारायणकाजी श्रेष्ठ

काठमाडौं । नेकपा (माओवादी केन्द्र)का वरिष्ठ उपाध्यक्ष नारायणकाजी श्रेष्ठले राणा शासनको अन्त्यपछि कसैले नगरेको काम आफ्नो पार्टीको नेतृत्वमा रहेको सरकारले गरेको दाबी गरेका छन् ।

शनिवार काठमाडौँमा आयोजित खबरदारी सभामा बोल्दै उपाध्यक्ष श्रेष्ठले माओवादी केन्द्र नेतृत्वको सरकारले सुशासन र समृद्धिलाई तीव्रता दिएको बताए । उनले प्रचण्ड नेतृत्वको सरकारले भ्रष्टाचारीलाई राति सुत्न नदिएको दाबी गरे । उनले भने, ‘माओवादीको प्रधानमन्त्री र गृहमन्त्री रहँदा कहिल्यै राम्रोसँग सुत्न नपाइने भो भनेर भ्रष्टाचारीहरूले भन्ने गर्थे ।’

प्रचण्ड सरकारले सुशासन, समृद्धि र सामाजिक न्यायलाई अघि बढाएको बताउँदै श्रेष्ठले भ्रष्टाचारविरुद्ध, राज्यलाई लुट्नेहरू, ठगीका विरुद्ध ठुलो अभियान सुरु गरेको दाबी गरे । उनले भ्रष्टाचारीहरूलाई जोगाउन र भ्रष्टाचार गर्नैका लागि अहिलेको सरकार बनेको बताए । यो सरकारले लोकतन्त्रको अपहरण गर्न खोजेको आरोप पनि उनले लगाए ।