कर्मचारीको आन्दोलनलाई बेवास्ता गर्दै नेपालगन्ज मेडिकल कलेजको फेरियो नाम

नेपालगन्ज । विगत २० दिनदेखि आन्दोलनमा रहेका कर्मचारीहरुको मागलाई बेवास्ता गर्दै नेपालगन्ज मेडिकल कलेज अन्तर्गतका शिक्षण अस्पतालहरुमा रातारात साईन बोर्ड परिवर्तन गर्ने र नयाँ जनशक्तिका लागि बिज्ञापन खोलिएको छ । सरकारी अस्पतालका कर्मचारीको न्युनतम तलव सरह सुबिधाको माग गर्दै आएका कर्मचारीहरुसँग वार्ता र समस्याबारे छलफल गर्न छाडेर अस्पताल प्रशासन आन्दोलनरत कर्मचारीलाई तर्साउने उद्देश्य सहित साइनबोर्ड परिवर्तन गर्ने र नयाँ बिज्ञापन खोल्ने तर्फ अग्रसर भएको हो ।

नेपालगन्ज मेडिकल कलेज अन्तर्गत विपी चोकको शिक्षण अस्पतालमा रातारात सञ्जीवनी कलेज अफ मेडिकल साइन्सेस प्रालिको बोर्ड झुण्डाइएको छ । न्युनतम सेवासुविधाको माग गर्दै लामो समयदेखि कर्मचारी आन्दोलनमा उत्रिएकै बेला अचानक कलेजको नामाकरण फेरिएको बोर्ड झण्डाइएको हो ।

कलेज प्रशासनले विभिन्न विभागमा गरेर ८ सय ९५ जनाको पदमा रोजगारी समेत माग गरेको छ । कलेजले निकालेको सूचना अनुसार अस्पताल र कलेजका लागि सबैभन्दा धेरै नर्सिङ जनशक्तिको माग भएको छ । कलेजले ४ सय जना नर्सका लागि रोजगारी खुला गरेको छ । कलेजले कन्सलटेन्ट डाक्टरदेखि मेडिकल अफिसर र फार्मेसी देखि ल्याबसम्मका विभागमा जनशक्ति माग गरेको छ ।

पूर्वाञ्चल विश्वविद्यालयबाट सम्बन्धन प्राप्त सञ्जीवनी कलेज अफ मेडिकल साइन्सेस प्रालि बुटवलामा रहेको थियो । गत साउनमा उक्त कलेज नेपालगन्ज हस्पटिल एन्ड रिसर्च ट्रेनिङ सेन्टर प्राली सँग मर्ज भएको थियो । मर्ज भएपछि कलेजको नाम सञ्जीवनी कलेज अफ मेडिकल साइन्सेस प्रालि भएको र बुटवलबाट नेपालगन्जमा स्थानान्तरण भएको थियो । यो कलेज मेडिकल व्यवसायी खुमा अर्यालले सञ्चालनमा ल्याएका हुन् ।

आन्दोलनरत कर्मचारीले कलेज प्रशासनको कार्यप्रती असन्तुष्टि जनाएका छन् । उनिहरुले विगत २० दिनदेखि आन्दोलनरत रहेका नेपालगन्ज मेडिकल कलेजमा रहेका कर्मचारीहरलाई त्रसित बनाउन र आन्दोलन असफल बनाउने खेलमा व्यवस्थापन पक्षले रातारात सन्जिवनी मेडिकल साइन्सेस भन्ने बोर्ड लगाएको टिप्पणी गरेका छन् । कलेज प्रशासनको कार्यबाट कर्मचारीहरु थप आक्रोशित भएको आन्दोलनरत कर्मचारीहरुले बताएका छन् ।

‘२५ औं वर्षदेखि कार्यरत रहेका कर्मचारीहरलाई व्यवस्थापन गर्नुको सट्टा थप उत्तेजित पार्ने कामको घोर भत्सर्ना गर्दछौं । दर्ता प्रक्रिया नभई, कर्मचारीहरलाई व्यवस्थापन नगरी विज्ञापन खुलाउने, बोर्ड लगाउने काम राम्रो होइन तत्काल यस विषयमा सरोकारवाला, प्रदेश सरकार, स्थानीय सरकारको ध्यानाकर्षण गराउन चाहान्छौं ।’ कर्मचारीहरुले भनेका छन् ।

मेडिकल कलेजका कर्मचारीहरु भने विभिन्न माग राखी करिब ३ हप्तादेखि आन्दोलनमा छन् । आन्दोलनका कारण अस्पतालको सेवा प्रभावित छ । आन्दोलन कै बीच अस्पतालमा सञ्जीवनीको बोर्ड लागेको छ भने ठूलो मात्रामा कर्मचारीको माग गरिएको छ ।