नेपालगन्ज । नेपाल पत्रकार महासंघ बाँकेले नेपालगन्जमा जारी प्रादेशिक महोत्सवमा निर्वाध समाचार संकलनको वातावरण बनाउन आयोजक नेपालगन्ज उद्योग वाणिज्य संघलाई आग्रह गरेको छ । पत्रकार महासंघ बाँकेका सचिव कृष्ण ओलीद्वारा आज विज्ञप्ति प्रकाशित गर्दै महोत्सव स्थलमा पत्रकारमाथि दुर्व्यवहार नगर्न र समाचार संकलनको वातावरण बनाउन आग्रह गरेको हो ।
सचिव ओलीद्वारा जारी विज्ञप्तिमा ‘नेपालगन्ज उद्योग वाणिज्य संघको मुख्य आयोजनामा नेपालगन्जमा जारी ‘प्रादेशिक महोत्सव २०८१’ मा पत्रकारहरुको सहज प्रवेश, पहुँच र रिपोर्टिङमैत्री वातावरणका लागि नेपाल पत्रकार महासंघ बाँके शाखाले चासो व्यक्त गर्दै आइरहेको उल्लेख गरिएको छ । विज्ञप्तिमा लेखिएको छ, ‘नेपालगञ्ज उद्योग वाणिज्य संघका अध्यक्ष, प्रवक्ता लगायत जिम्मेवार पदाधिकारीबाट प्रेस मैत्री वातावरणका लागि प्रतिबद्धता व्यक्त भएको र मिडियाको परिचयपत्रबाट महोत्सवस्थलभित्र प्रवेश गर्न मिल्ने प्रबन्ध गरिएको जानकारी आयोजकले गराइसकेको अवस्थामा पनि महोत्सवस्थलभित्र प्रवेश गर्दा भइरहेको अनावश्यक उल्झन र असहजताप्रति नेपाल पत्रकार महासंघ बाँके शाखाको गम्भीर ध्यानाकर्षण भएको छ ।’
विज्ञप्तिमा माघ १२ गते शनिबारका दिन मञ्च परिसरमा सांगीतिक कार्यक्रमको फोटो खिच्ने र भिडियो छायाँकन गरिरहेको अवस्थामा न्यूज बाँके अनलाइन मिडियामा कार्यरत पत्रकार टार्जन ओलीमाथि आफ्नो परिचयपत्र देखाउँदा देखाउँदै आयोजक स्वयं र सुरक्षाकर्मीबाट भएको दुव्र्यवहारको घटनाप्रति नेपाल पत्रकार महासंघ बाँके शाखादेवारा खेद व्यक्त गरिएको जनाइएको छ । महासंघले यस्ता घटना नदोहोर्याउन महोत्सव आयोजकलाई सचेत समेत गराएको छ ।
महासंघले पत्रकारहरुलाई आफू कार्यरत मिडियाबाट जारी भएको परिचयपत्रबाटै सहज प्रवेश र रिपोर्टिङ गर्ने अवस्था मिलाई प्रेसमैत्री वातावरण निर्माणका लागि वाणिज्य संघलाई ध्यानाकर्षण गराएको छ । साथै रिपोर्टिङका क्रममा सम्पूर्ण पत्रकारहरुलाई पत्रकार आचारसंहिताको पूर्णरुपमा पालना गर्दै मर्यादित रुपमा पत्रकारिता गर्न समेत आग्रह गरेको छ ।
त्यसैगरी पत्रकार टार्जन वलीमाथि भएको दुर्व्यवहारको घटनाप्रति प्रेस चौतारी नेपाल बाँके र प्रेस युनियन बाँकेले पनि छुट्टाछुट्टै विज्ञप्ति प्रकाशन गरेर गम्भीर ध्यानाकर्षण भएको जनाएको छ ।
प्रतिक्रिया