प्रादेशिक महोत्सव लुम्बिनीको, आकर्षण कर्णालीका उत्पादन

नेपालगन्ज । नेपालगन्जमा जारी लुम्बिनी प्रादेशिक महोत्सवमा कर्णालीका उत्पादनहरु अवलोकनकर्ताको आकर्षण बनेका छन् । अन्य स्टलहरुमा भन्दा महोत्सवमा राखिएका कर्णालीका उत्पादनहरु प्रति अवलोकनकर्ताले रुचि देखाएसँगै महोत्सवको आकर्षण नै कर्णालीका उत्पादन बनेको हो ।

महोत्सवमा कर्णालीमा उत्पादन भएका गाँजाको लत्ताकपडा देखि बनपाखामा पाईने जडिबुटी सम्मका सामाग्रीहरु प्रदर्शनका लागि राखिएका छन् । सल्यानको खुकुरी तरबार देखि हुम्लाको ओखर र भाङ्गो पनि मेलामा उपलब्ध छन् । जुम्लाको भाङको तेल, भाङको साबुन, मह देखि चिनो, मार्सि चामल, फापर पिठो, गाँजाको चियापत्ती जस्ता कर्णालीका उत्पादनहरु महोत्सवमा राखिएका छन् ।

अल्लो कपडा र गाँजाको कोट र झोलामा दर्शकको अभिरुची बढी भएपनि कर्णालीका खाद्यान्नमा अवलोकनकर्ताको खासै चासो नदेखिएको स्टल होल्डरहरुले बताए । महोत्सवमा अल्लो र गाँजाका पर्स, आस्टकोट, कोट, झोला, गलबन्दीआदी राखिएका छन् । हुम्ला संखेलीका हरिलाल बुढा पहिलो पटक हुम्लाको उत्पादन लिएर महोत्सवमा आएका छन् । कर्णालीलाई चिनेका केही ग्राहकले सामान किनेपनि हेरेर मात्र जाने धेरै भएको बुढाको गुनासो छ । अर्गाानीक र पहाडी उत्पादनलाई नेपालगन्जका स्थानीयले चिन्न नसकेको उनको भनाई छ । ‘असली माल मान्छेले चिनेनन् ।’ बुढाले भने ।

सल्यानमा बनेको खुकुरी लिएर स्टलमा बसेकी टीका बिक महोत्सवको व्यापारबाट सन्तुष्ट नै देखिन्छिन् । सापोनापो ब्यापार राम्रो भएको उनको भनाई छ । सल्यानमा बनेको खुकुरी, तरबार, मासु काट्ने दाउ र फलामका चक्कुहरु उनको स्टलमा छन् । छालाको खुकुरी राख्ने दाप पनि उनको स्टलमा पाईन्छ । दर्शकको रुची खुकुरी तर्फ नै बढी देखिएको बिकले बताइन् ।

पहिले पटक महोत्सवमा आएका जुम्लाका शैलेन्द्र एडी महोत्सवबाट आम्सिक खुसी देखिन्छन् । जुम्लाको मकै, चीनो, भाङ्गो, चुक, मकै, फापर र कोदोको पिठो सहित जुम्लाका स्थानीय दलहन उनको स्टलमा छ । ‘पहिलो अनुभव हो । कर्णालीलाई जनता माझ देखाउन पाईयो, खुसी नै छौं ।’ उनले भने ।

जडिबुटी ब्यवसायी संघले राखेको स्टलमा पनि अधिकांस जडिबुटीहरु कर्णाली कै रहेका छन् । ब्यापार भन्दा प्रदर्शनमा सिमित रहेको संघको स्टलमा जङ्गलमा पाईने वडिबुटीहरु राखिएका छन् । कर्णालीले महोत्सवको रौनक बढाएको नेपालगन्ज उद्योग वाणिज्य संघका अध्यक्ष टंक धामीले बताए । उनले महोत्सवबाट कर्णाली र दुर दराजका कृषि उत्पादनहरुको प्रवद्र्धन भएको बताए । शहरमा बसेका युवाहरुले पनि हिमाली भेगमा हुने उपजहरु देख्न पाएको उल्लेख गर्दै धामीले दर्शकहरु पनि कृषिका स्टलहरुमा बढी रोकीने गरेको जनाए ।

मेलाको मुल उद्देश्यलाई कर्णालीका स्टलहरुले प्रतिनिधित्व गरेको महोत्सवका प्रचार संयोजक डम्बर चन्दले बताए । उनले महोत्सवको मुख्य उद्देश्यले स्वदेशी उत्पादनको प्रचार प्रशार गर्नु रहेको स्पष्ट पारे ।