काठमाडौँ । नेपाल आयल निगमले ग्यासको मुल्य यथावत रहेको जनाएको छ ।
मंगलबार नेपाल एलपी ग्यास उद्योग संघसँग भएको सरकारको सहमतिपछि आन्दोलनका कार्यक्रम फिर्ता भएको जनाउदै निगमले ग्यास उद्योगहरुबाट अब ग्यास सहज उपलब्ध हुने बताएको हो । साथै निगमले ग्यासको मुल्य यथावत रहने पनि जानकारी दिएको छ ।
आज भएको पाँच बुँदे सहमति अनुसार उद्योगीको माग अनुसार ग्यासमा प्रति सिलिण्डर १२ रुपैयाँ ७५ पैसा उद्योगीहरुको खर्चमा समायोजन गर्ने सहमति भएको थियो । उद्योगीहरुको लाग्ने खर्चमा नयाँ मूल्य समायोजन भएपनि निगमले ग्यासको उपभोक्ता मुल्य यथावत रहने स्पष्ट गरेको छ ।
ग्यास उद्योगीलाई दिइँदै आएको मुनाफा प्रतिसिलिण्डर रकममा प्रदान गर्ने वा निश्चित प्रतिशतमा प्रदान गर्ने भन्ने सम्बन्धमा निगमले उपसमिति बनाई अध्ययन कार्य अगाडि बढाउने सहमति भएको छ । यस्तै निगम र संघ दुवैको समन्वयमा सम्बोधन गर्न सकिने मागहरू निगम व्यवस्थापनले सम्बोधन गर्ने पनि सहमति भएको छ ।
निगमले सम्बोधन गर्न नसक्ने अन्य मागहरू सञ्चालक समिति तथा उद्योग, वाणिज्य तथा आपूर्ति मन्त्रालयमा पेस गर्ने र नेपाल एल.पी ग्यास उद्योग संघले आजदेखि एल.पी ग्यासको आपूर्ति सहज बनाउने सहमति भएको छ ।
प्रतिक्रिया