बुटवल । रुपन्देहीको एउटा परीक्षा केन्द्रमा अर्केको नाममा परीक्षा दिन बसेका एकजना पक्राउ परेका छन् । बिहीबारदेखि सुरू भएको एसइई परीक्षा अन्तर्गत भैरहवास्थित श्री रूपन्देही लिलाराम न्यौपाने माध्यमिक विद्यालय परीक्षा केन्द्रबाट नक्कली परीक्षार्थी पक्राउ परेका हुन् ।
पक्राउ पर्नेमा रुपन्देहीको शान्ती नमुना माविमा अध्ययनरत विद्यार्थी आशिष बानियाँ रहेका छन् । बानियाँले भैरहवास्थित श्री सुसंस्कृत माध्यमिक विद्यालयका विद्यार्थी संजय चौधरीका लागि परीक्षा दिन परीक्षा केन्द्र पुगेका थिए ।
संजय चौधरीको नाममा अंग्रेजी विषयको ग्रेडवृद्धिको परीक्षा दिन गएका बानियाँलाई निरीक्षणको क्रममा पक्राउ गरिएको जिल्ला प्रहरी कार्यालय रूपन्देहीका प्रमुख प्रहरी उपरीक्षक रञ्जित सिंह राठौरले जानकारी दिए। चौधरी भैरहवास्थित श्री सुसंस्कृत माध्यमिक विद्यालयका विद्यार्थी हुन्। प्रहरीका अनुसार उनको नाममा परीक्षा दिन आएका बानियाँ २०८० सालको एसइई परीक्षा उत्तीर्ण भई हाल कक्षा ११ मा तिलोत्तमास्थित शान्ति नमूना माविमा अध्ययन गरिरहेका छन् ।
पक्राउ परेका बानियाँलाई जिल्ला प्रहरी कार्यालयको हिरासतमा राखेर शिक्षा ऐन अन्तर्गत मुद्दा दर्ता गरी कारबाही प्रक्रिया अगाडि बढाइएको एसपी राठौरले बताए । अन्य क्षेत्रमा भने बिहीबारको परीक्षा शान्तिपूर्ण रूपमा सम्पन्न भएको प्रहरीले जनाएको छ।
प्रतिक्रिया