नेपालगन्ज । बाँकेको नौवस्तास्थित औद्योगिक क्षेत्र निर्माणस्थलको अतिक्रमण हटाउन सुरु गरिएको छ । गत बिहिबारको सर्वदलीय र सर्वपक्षीय बैठकको निर्णय अनुसार आजबाट अतिक्रमण हटाउने र सिमांकन गर्ने कार्य सुरु गरिएको हो ।
औद्योगिक क्षेत्र भित्रको सिमांकनमा परेका घर टहरा हटाउँदै बाटो निर्माणको काम पनि आजैबाट सुरु गरिएको छ । बाँकेको बैजनाथ गाउँपालिका वडा नम्बर ३ मा लुम्बिनी प्रदेश स्तरीय नौवस्ता औद्योगिक क्षेत्र निर्माण गर्ने निर्णय भएपनि विवादका कारण वषौंदेखि औद्योगिक क्षेत्र निर्मा(ाको काम सुरु हुन सकेको थिएन । जग्गा सिमांकन गर्न खोज्दा यसअघि औद्योगिक क्षेत्रको नाममा लागत कट्टा गरिएको जग्गामा बसोबास गर्दै आएका स्थानीयले विवाद गर्दै अवरोध गरेका थिए ।
औद्योगिक क्षेत्रको जग्गा सिमांकनमा विवाद उत्पन्न भएपछि गत बिहीबार जिल्ला प्रशासन कार्यालय बाँकेमा बसेको सर्वदलिय तथा सर्वपक्षिय बैठकले सोमबारबाट जग्गा सिमांकन गर्ने सहमती गरेको थियो । बैठकले यसअघि भएको सहमति बमोजिम करिव ५५ विगाहा जग्गा छाडेर बाँकी जग्गामा औद्योगिक क्षेत्रको काम कानुन बमोजिम गर्ने निर्णय गरेको थियो ।
जग्गाको सिमांकन स्वरुप सोमबार मानव बस्ती र औद्योगिक क्षेत्रको जग्ग्गाको बीचबाट बाटो खोल्न दुई वटा जेसिबी प्रयोग प्रयोग गरेर अतिक्रमित क्षेत्र खाली गराउन सुरु गरिएको छ ।
औद्योगिक क्षेत्र ब्यवस्थापन लिमिटेडका महाप्रबन्धक पदम ओलीले सर्बदलिय र सर्बपक्षीय निर्णय अनुसार खाली गराउन सुरु गरिएको बताए ।
प्रतिक्रिया