बुटवल । बुटवलको ऐतिहासिक तथा पर्यटकीय स्थल मणिमुकुन्द सेन उद्यान (फूलबारी) मा पछिल्लो एक वर्षमा पाँच लाख ४७ हजार १९९ जना आन्तरिक तथा बाह्य पर्यटकले अवलोकन गरेका छन् । मणिमुकुन्द सेन उद्यान संरक्षण समितिका अनुसार आर्थिक वर्ष २०८१/८२ मा सर्वाधिक भारतीय पर्यटकको आगमन भएको छ ।
उद्यान संरक्षण समितिले आयोजना गरेको वार्षिक समीक्षा कार्यक्रममार्फत समितिका अध्यक्ष माधव प्रसाद नेपालले अध्ययन केन्द्रका रूपमा उद्यानलाई विकास गर्ने योजना रहेको जानकारी दिए । उनका अनुसार ७४ हजार ५९२ जना भारतीय नागरिक उद्यानमा घुम्न आएका थिए, जसमा ७१ हजार ६९५ जना विद्यार्थी थिए ।
“धेरै विद्यार्थीहरू अनुसन्धानका लागि डाटा संकलन गर्न उद्यानमा आउने गरेका छन्,” अध्यक्ष नेपालले बताए । सेनवंशीय दरबारको संरक्षण तथा संग्रहालय निर्माणका लागि संघीय सरकारले ३ करोड रुपैयाँ बजेट विनियोजन गरेको समेत उनले जानकारी दिए ।
अध्यक्ष नेपालका अनुसार उद्यानलाई सांस्कृतिक केन्द्र, रिसर्च सेन्टर र पर्यटकीय गन्तव्यका रूपमा विकास गर्न स्पष्ट खाका तयार गरिएको छ । योजना अन्तर्गत नयाँ सेल्फी जोन, ट्री रेस्टुरेन्ट, सिसाको पुल, जिपलाइनजस्ता संरचना निर्माण, मुनामदन बगैंचाको सौन्दर्यीकरण, बुटिक गार्डेन, एक्युरियम, डिजिटल सूचना केन्द्र, र रिसर्च फेलोसिप कार्यक्रम सञ्चालन गर्ने तयारी गरिएको छ ।
महासचिव युवराज घिमिरेले संरचनागत विकासका लागि स्थानीय, प्रदेश र संघ सरकारसँग सहकार्य भइरहेको बताए । यद्यपि, पर्याप्त बजेटको अभाव, सामुदायिक वनसँगको कानुनी जटिलता, प्राविधिक जनशक्ति र पानी आपूर्तिमा चुनौती रहेको बताए ।
समितिका कोषाध्यक्ष मिलेन्द्र श्रेष्ठका अनुसार गत वर्ष उद्यानको आम्दानी ४ करोड ६ लाख रुपैयाँ तथा खर्च ३ करोड ९६ लाख रुपैयाँ थियो । मनोरञ्जन कर, आयकर लगायत शीर्षकमा ४७ लाख रुपैयाँभन्दा बढी कर भुक्तानी गरिएको छ ।
हाल उद्यानमा १६ जना स्थायी तथा करार र २० जना दैनिक ज्यालादारी गरी ३६ जना प्रत्यक्ष रोजगारीमा छन् भने सटर, बाल उद्यान र अन्य सेवा सञ्चालनमार्फत करिब १५० जना परोक्ष रोजगारीमा संलग्न रहेको जानकारी समितिले दिएको छ ।
कार्यक्रममा सहभागी पत्रकारहरूले उद्यानलाई थप व्यवस्थित, शिक्षामैत्री र अन्तर्राष्ट्रिय पर्यटकीय गन्तव्यका रूपमा विकास गर्न संयुक्त कार्ययोजना तथा सांस्कृतिक प्रदर्शन कार्यक्रम आवश्यक रहेको सुझाव दिएका थिए ।
प्रतिक्रिया